Archive for the ‘Osasuna’ Category


Autopista Elektrikorik Ez plataformak prentsaurrekoa egin zuen, larunbat eguerdian, Donostian. Deikaztelu-Itsaso goi tentsioko argindar linearen proiektuaren prozedura administratiboa aurrera doala gaitzetsi, eta jarrera hori Espainiako Gobernuaren partetik “inposizioa” dela salatu du. Nafarroako eta Gipuzkoako 173 alkatek maiatzaren 15ean Espainiako Gobernuaren ordezkaritzan aurkeztutako eskariari ez diola kasurik egin salatu du. Proiektuaren tramitazioa gerarazteko, eta erakusketa publikoan ez jartzeko eskatu zuten alkateek, harik eta 2014-2022 plangintza elektrikoa onartzen ez den bitartean, behintzat. REE Red Electrica de España SA enpresak —proiektuaren egilea eta sustatzailea— maiatzaren 31n argitaratu zuen proiektuaren erakusketa publikoa eta baimen eskaera Gipuzkoako eta Nafarroako aldizkari ofizialetan. Proiektua udaletara ere iritsi da.

Agerraldian izan ziren Ibon Elkarresta Gabiriako alkatea eta  Iñaki Ugalde Mutiloakoa ere. Udalburuek proiektuaren aurka dauden 216 udal eta kontzejuen izenean esan dutenez, kaltetuak izango diren ia herri guztietako erakunde lokalen ordezkariekiko errespetu falta da tramitazioarekin segitzea. Neurri horretako proiektu erraldoi bat horrenbesteko azkartasunarekin tramitatu nahi izatea harrigarritzat jo dute, eta gogorarazi dute REEk berak aitortua duela inolako urgentziarik ez daukala linea horrek. “Herrien etorkizuneko garapena baldintzatuko du lineak. Gainera, bere beharraren justifikaziorik ez dago ez hornikuntza aldetik, ez energia eskaera aldetik”.

Plataformaren bozeramaile Alberto Friasek gaineratu du autopista elektriko horrek 127 kilometro luze izango dituela, Deikaztelu (Nafarroa) eta Itsaso (Ezkio-Itsaso, Goierri) artean. Berez Gabirian amaituko da linea, Katarain baserriaren inguruan, hor Gasteiz-Itsaso lineari batuko bailitzaioke. Zabalean 50 metroko pasabidea soilduko lukete, azpian. 248 dorre eraikiko dituzte, 85 metroko altuera ere hartuko dutenak. “Natura 2000 Sarean babestuta dauden eremuei zuzenean eragingo die lineak, Urbasa-Andia edo Oria Garaia Zaintza Bereziko Zonaldeei adibidez, Galzorian dauden espezieen Euskal Katalogoko 57 espezieri ere bai, eta hiru mila zuhaitz (623 haritz, 613 pago eta 268 arte) moztea ekarriko luke berehalako ondoriotzat.

Prentsaurrekoa Donostiako Atotxa dorrearen oinean egin dute, hain justu. Hiriko etxebizitza garaiena da, 70 metro altukoa. Alderaketa egin dute, eraiki nahi dituzten dorreen altuera 85 metrokoa dela nabarmenduz.

Agerraldia Donostian. Linearen matxoiek Atotxa dorreak (70 metro ditu) baino 15 metro gehiagoko altuera izango lukete.

Agerraldia Donostian. Linearen matxoiek Atotxa dorreak (70 metro ditu) baino 15 metro gehiagoko altuera izango lukete.

Bestetik, Friasek esan du jakinazpen publian jarritako proiektuak ez duela betetzen Europako Batasunaren Prekauzio Printzipioa, eremu elektromagnetikoek osasunean izan dezaketen kalteen ingurukoa. Proiektuaren memorian dioenez, 28 herri lineatik 1.000 metrora baino gutxiagora geratuko lirateke, bost herrigune 500 metro baino gutxiagora, eta 17 etxebizitza 300 metro baino gutxiagora”. Eragina izango duten eskualdeek etorkizunean ez dutela garapen proiekturik garatzerik izango gaineratu du, eta gaur egun indarrean dagoen araudia de facto indargabetzea.

Ekainaren 16an, hurrengo igandean, Nafarroako eta Gipuzkoako 34 udalerritan —tartean da Gabiria— burutuko diren herri kontsultetan parte hartzeko eskatu du plataformak. Erakundeei, berriz, Diputazioarengandik eta gobernu atuonomikoengandik hasita, aterako diren emaitzak aintzat hartzeko eta boto-kutxetako herritarren gehiengoaren nahia errespetatzeko esan die. Herri galdeketaren xehetasunak ostegunean emango dituzte plataformakoek.


Deikaztelu eta Itsaso arteko 400 kV-eko goi tentsioko argindar linearen kalteak agerian uzteko, eta Nafarroako eta Gipuzkoako herrietan nahiz kontzejuetan REE Red Electrica de España SAren proiektu horrek duen aurkakotasuna adierazteko, 400.000 volt dokumentala egin du Autopista Elektrikorik Ez plataformak. Berriki bukatu dute, eta Interneten dago ikusgai. Gattiken ekoiztetxeak ondu du 24 minutuko ikus-entzunezkoa.

Bestetik, herrian herri batzarra egin zen maiatzaren 24an. Talde bat eratu zen, ekainaren 16an egingo den herri galdeketa prestatzeko.

Goi tentsioko lineen aurkako herriko taldea, maiatzaren 24an.

Goi tentsioko lineen aurkako herriko taldea, maiatzaren 24an.

Goi tentsioko lineen inguruko informazioa, orain arte argitaratutakoa.

Asteburu honetan mendi martxa eta kanpaldia egingo dituzte, Deikaztelu-Itsaso argindar línea igaroko litzatekeen parajeetatik. Gabiriako plazan hasiko da ibilaldia, larunbat eguerdian (ekainak 8). Handik Barbari gaineraino joan, eta larunbat gaua han igaroko dute, kanpaldian. Igandean, Etxegarate gainean amaituko da mendi ibilaldia.


Deikaztelu (Nafarroa) eta Ezkio-Itsaso artean 400.000 volteko indarra garraiatuko lukeen zirkuitu bikoitzeko argindar linea eraikitzeko baimen administratiboa eskatu du REE Red Eléctrica de España enpresak. Gipuzkoako Aldizkari Ofizialean gaur argitaratu dute iragarki ofiziala. Horren bidez, publikoki jakinarazi du Ingurumen Inpaktuaren Agiria onartzeko eskatu duela, baita exekuzio proiektua onartzeko eta baimen administratiboa emateko ere.

Iragarki berean proiektuaren xehetasun batzuk ere ematen ditu. 400 kV-eko indarra garaituko luke lineak, korronte alterno trifasikoan, 50 hertzeko frekuentzian. Sareak 420 kV-eko gehienezko tentsioa hartu ahalko du. Hariaren tenperatura gehienez 85º C-koa izango litzateke. Bi zirkuitu izango lirateke, eta fase bakoitzean hiru hari eroale. Lineak denera 100 kilometroko luzera izango du, proiektuaren arabera. 44.631.286 euroko aurrekontua du.

Azpiegituraren helburuen artean, REEk honakoak aipatzen ditu: “etorkizunean eraikiko den Deikazteluko azpiestazio elektrikoa (400 kV-ekoa) eta gaur egun badagoen Itsasoko azpiestazioa lotuko ditu proiektu honetako lineak, gaur egungo Itsaso-Gasteiz linea (400 kVekoa) luzatuz, Gabirian”. Nafarroan sortzea aurreikusten duten energia garraiatzeko “ezinbestekoa” izango da linea hori, REEren arabera, “baita orain dauden azpiegitura elektrikoen sarea indartzeko ere, segurtasuna, fidagarritasuna eta sistema elektrikoaren kalitatea nabarmen igoko baitu, bai erregio mailan, bai nazio mailan”.

Proiektua eta Ingurumen Inpaktuaren Azterketa behatzeko 30 eguneko epea jarri dute orain.

GAO 2013-5-31 Deikaztelu-Itsaso proiektuaren informazioa


Deikaztelu-Itsaso goi tentsioko linea proiektua geratzea eskatzeko agiria sinatu dute 170 alkatek, tartean Gabiriakoak. Altsasun egin zuten batzarra, larunbatean, proiektuak eragin diezaiekeen 216 udal eta kontzejutako ordezkariek. Mutiloako alkate Iñaki Ugaldek esan duenez, “herritarrak aurka egon arren, Red Eléctrica de Españak proiektua gauzatzeko izapideekin jarraitzen du. Urgentziaz egin nahi du, gainera”. Espainiako Gobernuak elektrizitatearen sektorerako datozen urteetarako dituen egitasmoak argitu arte, gutxienez, bertan behera uzteko eskatu dute.

Goi tentsioko linearen aurkako plataformako bozeramaile Alberto Friasek gogorarazi du 2008an egindako energia aurreikuspenak kontuan hartuta erabaki zela proiektua egitea. “Ekonomia %3 haztea aurreikusten zen orduan. Argi dago aurreikuspen erabat okerra zela. Errealitatea oso bestelakoa da”. Espainiako Gobernuak eta enpresak berak egindako txostenak aldaketa hori onartzen dutela gogorarazi du Friasek. “Espainiako Gobernuak lege dekretu bat kaleratu zuen, beste plangintza bat egiteko aginduz eta plangintza horrek egoera ekonomikoa kontuan hartu behar zuela gogoratuz”.


Gabirian, Mutiloan eta Zerainen goi tentsioko lineei buruzko herri galdeketa edo kontsulta egingo da, ekainaren 16an. Aurreko ostiralean herri batzarrean aurkeztutako ideia gaur goizean jakinarazi dute hiru herrietako eta Autopista Elektrikorik Ez plataformako ordezkariek, Donostiako Koldo Mitxelena Kulturunean.

Denera hiru herrietako 19 lagun —horietatik bost gabiriarrak— agertu dira gaur prentsaurrekoan, bost eserita eta atzean zutik beste hamalau. “Pauso bat aurrera emateko garaia” dela azaldu dute, Red Eléctrica de España SAk Itsaso eta Deikaztelu artean 400.000 volteko goi tentsioko linearen tramitazioarekin aurrera jarraitzea erabaki ondoren (apirilaren 8an REEko bi ordezkarik Gabiriako udaletxean aurkeztu zuten asmoa).

Gabiriako, Mutiloako eta Zeraingo bizilagunak, eta Autopista Elektrikorik Ez plataformako bozemailea, gaur, Donostiako KM Kulturunean./Asier Zaldua–Hitza

Gabiriako, Mutiloako eta Zeraingo bizilagunak, eta Autopista Elektrikorik Ez plataformako bozemailea, gaur, Donostiako KM Kulturunean./Asier Zaldua–Hitza

2011ko abuztuan iritsi zen, lehen aldiz, REEren Itsaso-Deikaztelu linearen proiektuaren informazioa udaletxera. Lehenago, urte bereko martxoan, Gueñestik Itsasora ezaugarri berbereko beste linea bat egiteko asmoa plazaratu zuen. Orduz geroztik, Bizkaiko hiru herrik biltzarra osatu zuten, egitasmoaren aurka; eta Nafarroako eta Gipuzkoako 216 udal eta kontzejutan mozioa onartu dute, aurkakotasuna adierazteko. 2012ko abenduaren 16an, iaz, Altsasuko Aldarrikapenaren bidez, hainbat arlotako 500 pertsona agertu ziren proiektuaren aurka.

“Erreleboa hartzeko garaia dela uste dugu, baita herriaren ahotsa entzunaraztekoa ere, jokoan gure osasuna, gure ingurumena, gure paisaia edota gure garapena bakarrik ez daudelako, hurrengo belaunaldiei utziko diegun etorkizuna ere bai”, esan du Asier Agirre gabiriarrak gaur goizean. Proiektu hori ez dela beharrezkoa gaineratu dute, “ez bada enpresa sustatzailearen eta multinazionalen etekinak, dagoeneko oparoak, ugaritzeko”.

Galdeketan parte hartzera animatu dituzte herritar guztiak, “zuzenean herritarren iritzia ezagutu dezagun eta erakundeei eskatzeko kontuan har dezaten galdeketaren emaitza”. Proiektuak eragindako beste herriei ere bilera irekiak egiteko deia egin diete, herri galdeketak egiteko aukera azter dezaten. “Eremuan prestigioa duten eta erreferente diren pertsonez osatutako jarraipen batzordea” eratuko da, prozesuaren “gardentasuna eta garbitasuna” erakusteko. Autopista Elektrikorik Ez plataformako Alberto Friasek hiru herrietako bizilagunek hartutako erabakia txalotu du: “Polita da. Gonbidapena egingo diegu beste herriei, herri batzarren bidez gauza bera egiteko”.

Goi tentsioko lineei buruz blog honetan ateratako albisteen bilduma, HEMEN.

Kontsulta deiak hedabide digitaletan izan duen oihartzuna, gaur:

  • Berria.info: “Goi tentsioko linearen inguruko herri galdeketak egingo dituzte. Ekainaren 16an, Gipuzkoako Gabiria, Mutiloa eta Zerain herrietan izango dira bozketak, herri batzarren ekimenez”.
  • Goierri.hitza.info: “Goi tentsioko linearen aurka herri galdeketa egingo dute hiru herritan”
  • Naiz.info: “Gabiria, Mutiloa y Zerain celebran el 16 de junio una consulta popular sobre la línea de alta tensión”
  • Europa Press: “Gabiria, Mutiloa y Zerain celebran el 16 de junio una consulta popular sobre la línea de alta tensión Itsaso-Dicastillo”.
  • Diario Vasco: “Vecinos de Gabiria, Mutiloa y Zerain convocan una consulta popular contra una línea de alta tensión”. Eta bideoa.

Deikaztelu-Itsaso goi tentsioko linea proiektuaren inguruan “azkeneko berriak” jakinarazteko bilera izango da, gaur. 19:00etan, Etxeberri kultur etxean da batzarra, herritar guztiei irekia. “Herritarrei aurrera begira egingo diren gauzen berri emateko eta denen beharra dagoela esateko da”, aurreratu dute deitzaileek.


Goierriko Goi Tentsioko Linearik Ez plataformak tentsio altuko argindar lineen kontrako eguna ospatuko du, bihar larunbata, Seguran. Gabiriarrek han parte hartuko dute. Defenda dezagun gure ingurumena, etorkizuna, osasuna, ondarea. Autopista elektrikorik ez izango du leloa.

Egitaraua eguerdian hasiko da. 12:00etatik 13:00etara, informazio gunea jarriko dute Segurako plazan; 13:00etatik 14:30era, triki-poteoa egingo dute;  eta 14:00etan, kantu bazkaria. Helduen bazkariaren prezioa 15 euro da, eta menua paella, haragi gisatua eta postrea. Haurrena, 8 euro (makarroiak, solomoa eta postrea). Tiketak apirilaren 10ean jarri zituzten salgai, Goierriko hainbat herritako tabernetan (tartean Gabiriako Ostatuan), eta asteartean (hilak 23) ziren erretiratzekoak.

Goi tentsioko azpiegituren aurkako pankarta, Euskal Herriko Itzulia Gabiriatik pasatu zenean, apirilaren 5ean./AMM

Goi tentsioko azpiegituren aurkako pankarta, Euskal Herriko Itzulia Gabiriatik pasatu zenean, apirilaren 5ean./AMM


Goierriko Goi Tentsioko Linearik Ez plataformak azpiegitura horren aurkako festa-egun bat antolatu du. Apirilaren 27an izango da, larunbatarekin, Seguran. Gabiriarrek han parte hartuko dute. Eguerdian informazio gunea jarriko dute, plazan. 13:00etan triki-poteoa egingo dute, eta 14:00etan bazkaria. Bazkaltzera joateko txartelak aurrez erosi beharra dago, apirilaren 23rako, asteartea. Gabirian Ostatuan eros litezke. Helduenak 15 euro balio du (menuan paella, haragi gisatua eta postrea dago), eta haurrenak 8 euro (makarroiak, solomoa eta postrea).

Bestetik, azpiegitura hori eraikitzearen aurka 400 minutuko protesta egingo da, bihar larunbata, Iruñean. Gabiriako bizilagunei hara joateko eskatu zien Gabiriako Udalak, bando bidez, martxoaren 27an. Egitaraua 11:30ean hasiko da, Gaztelu plazan, eta 18:00etan bukatu. Ekimen ugari egingo dira bien bitartean: informazio banaketa, hitzaldiak, dantzak, musika, paella erraldoia bazkaritarako… Joateko asmoa duenak Gorka Maiz zinegotziari deitu behar dio (687 104 362). Gutxieneko jende kopuru batek izena ematen badu autobusa antolatuko da. “Garrantzitsua da ahalik eta jende gehien bertaratzea”, azaldu zuen udalak bandoan.


Astea elkarretaratze batekin hasi da, gaur. REE Red Eléctrica de España enpresako ordezkariek eta Gabiriako Udalekoek bilera egin behar zutela eta, 40 bat lagun plazan elkartu dira, 08:45ean. Bilera bederatzietan hasi da, eta pare bat ordu iraun du. Enpresako bi ordezkarik Deikaztelu-Itsaso goi tentsioko linearen (400.000 voltio) azalpenak eman dizkiete. Espainiako Gobernuak egitasmoari azkenean argi berdea ematen badio, linea horrek herria zeharkatuko du.

REEren planoen arabera, linearen trazatua Mutiloa aldetik sartuko da, Troiko meategien hondakin urtegiaren atzealdetik, Gesaleko sakonean. Argindegi eta Bekoetxe ondotik igaroko litzateke, Aranburu baserrirantz. Aurreraxeago, gaur egun dagoen goi tentsioko linea batekin bat egingo luke, eta haren bidetik jarraituko luke, Katarainen ondotik. Linea hori Ardantza gainetik pasatzen dena da, eta horrek lotuko luke Itsasoko azpiestazio elektrikoarekin.

'Linearik ez' pankartaren atzean elkartu dira hainbat herritar, eta han egon dira bilera bukatu artean./Asier Zaldua–Hitza

‘Linearik ez’ pankartaren atzean elkartu dira hainbat herritar, eta han egon dira bilera bukatu artean./Asier Zaldua–Hitza

Elkarretaratzea

REEko ordezkariak udaletxean sartzen, eta herritarrak bilduta./Asier Zaldua–Hitza


Kolorrektaleko minbizia atzemateko lagin azterketen kanpaina astelehenean bukatuko du Osakidetzak. Gabirian, Ezkio-Itsason, Urretxun eta Zumarragan garatu du Osasun Sailak, 2012ko urrian hasita. Koloneko eta uzkiko minbizia aurrez atzemateko analisiak egiteko aukera eman die 50-69 urte arteko gizon eta emakumeei. Lau herri horietan denera 4.159 pertsonak jaso zuten etxean kit-a, gorotz zati txiki bat jaso eta herriko anbulatorioan entregatzeko. Laborategian, gorotzetan odolik ba ote dagoen analizatu du Osakidetzak. Lagina mediku kontsultara eramateko azken eguna biharkoa da.


Itxura guztien arabera, Deikaztelu-Itsaso goi tentsioko argindar linearen proiektuak egiteko, REE enpresak argi berdea jasoko du Espainiako Gobernuarengandik. Hala aurreratu du udalak, azkena banatu duen bandoan. “Egoeraren larritasuna ikusirik eta martxoaren erdi alderako proiektua aurkeztuko dutela jakinik”, dio idatziak. Linearen aurkako Goierriko plataformak bilera batera deitu ditu herritarrak, udalak jakinarazi duenez. Egitasmoa gelditzeko zer egin litekeen erabaki nahi dute. Bilera otsailaren 7an da, osteguna, Segurako kultur etxean, 18:30ean.

Linea horrek 400.000 volteko indarra garraituko luke Nafarroako herri horretatik Ezkio-Itsasoko zentralera, handik Frantziara bideratzeko. Duela gutxi, ezaugarri berdineko beste linea bat egiteko baimena eman du Espainiak, Gueñes-Itsaso. Llinea hori ere Gabiriatik pasatuko da.


Herrian yoga egiteko aukera dago, duela urte batzuetatik. Orain, urtearen hasieran, jende gehiagorentzat lekua badagoela, eta izena emateko aukera eman dute arduradunek. Osoko yoga (integrala) egiten dute, astean bi saiotan: astearteetan eta ostegunetan, 19:00etatik 20:30era. Interesatuek Marian irakaslearekin hitz egin behar dute (617 520 402).


Minbiziaren Aurkako Gipuzkoako Elkarteak egoitza atzo zabaldu zuen, Zumarragan (Iparragirre hiribidea, 1). Goierriko 22 herrietako bizilagunei emango die han zerbitzua, tartean Gabiriakoei. Ostiralean inauguratu zuten, eta zerbitzuan  urtarrilaren atzo, astelehena, hasi zen. Astelehenetik ostiralera egongo da zabalik. Psikologo batek eta gizarte langile batek atendituko dituzte gaixoak astean bi egunetan, eta gainontzeko hiruretan boluntarioak egongo dira. Minbiziarekin zerikusia duen edozein bizilagunentzat emango dute zerbitzua, bai gaixoentzat, bai senitartekoentzat. Informazio eta orientazio onkologikoa emango dute, material ortopedikoa utziko dute, laguntza psikologikoa eman, taldeko psikoterapiak egin eta prebentzio kanpainak edo tailerrak antolatuko dituzte.


Berez abenduaren 20an egitekoa bazuten ere, Eusko Jaurlaritzak gaur arratsaldean aurkeztuko du Troiko meategietako hondakin-urtegiari buruzko larrialdi plana. Arrisku kimikoa duten enpresen eta guneen eremuetan egin du larrialdi plana jaurlaritzaren Herrizaingo Sailak. Istripuren bat gertatuko balitz, bizilagunek zer jokabide izan behar duten aurrez zehaztuta edukitzea da helburua.

Informazio bilera Gabiriako eta Ormaiztegiko bizilagunentzat izango da, bi udalerriei eragingo liekeelako nagusiki balizko ezbeharrak. Ormaiztegiko kultur etxean da saioa, gaur 18:30ean.


Eusko Jaurlaritzaren Herrizaingo Saileko Larrialdien eta Meteorologia Zuzendaritzak bilera informatiboa egingo du, gaur osteguna, Gabiriako eta Ormaiztegiko bizilagunei zuzenduta (Ormaiztegiko kultur etxean, 18:30ean). Arrisku kimikoa duten enpresen inguruetan bizi diren bizilagunentzat babesa “indartu” nahi du jaurlaritzak. Kasu honetan, Troia meategietako hondakin urtegia da Gabirian arrisku kimikoa eta isuri kutsagarriak eragin ditzakeen elementua, Exminesa enpresak eraikitakoa Gesaleko sakonean.

Berriki Kanpoko Larrialdi Plana onartu eta homologatu dute Troiko hondakindegian. Arrisku kimikoa duten enpresa horietan, istripu kasuetan bizilagunek hartu beharreko segurtasun neurriak eta zer jokabide izan behar duten informazioa ematea da kanpainaren helburua. EAEko 11 enpresaren eremuei eragingo die: Bizkaian 9, Araban 1 eta Gipuzkoan 1, Troikoa. Informazio kanpainan, lehenbizi denera 38.000 gutun bidaliko dizkie jaurlaritzak bizilagunei, eta ondoren bilerak antolatuko dira herrietan. Gabiriako eta Ormaiztegiko bizilagunena gaur egingo da, kanpainaren azken egunean.