Dhuna musika taldeari elkarrizketa Goierri Telebistako ‘Ikusi irratia’ saioan

Dhuba musika taldearen azkeneko emanaldia telebistan izan da. Goierri Telebistako Ikusi irratia saioan elkarrizketatu zituen Mikel Alvarez kaztetariak taldeko hiru kideak, Nerea Iztueta gabiriarra, Ane Arrieta segurarra eta Irati Badiola zegamarra.

Iñigoren eta Markelen aldeko kontzertuaren bideoa

Iñigo Murua gabiriar jatorriko mutikoaren alde eta Markel Lopez urretxuarraren alde kontzertu benefikoa egin zen, atzo, Zumarragako Zelai Ariztin. Gorka Hermosa soinu-jotzaileak antolatu du, eta harekin batera Urretxuko nahiz Zumarragako artistak aritu ziren: dantzak, musika joz edo kantatuz,… Gotzon Aranburu kazetariak bideoa editatu du ikuskizunarekin.

Iñigo mutikoari laguntzeko elkartasun kanpaina eta kontzertu benefikoa

Urretxun eta Zumarragan maiatzaren 22tik abian da Tantaz tanta, lagundu Iñigo izeneko elkartasun kanpaina. Gabiriar jatorriko Iñigo Murua 14 urteko mutikoari laguntzeko da. Jaio aurretik buruko infartoa eduki zuen, eta ondorio neurologikoak utzi zizkion. Otsailaz geroztik Santiagoko (Galizia) erietxe batean terapia jasotzen ari da, eragin positiboarekin. Tratamendua garestia da, ordea; hilean 3.000 euro, mutikoaren aita Luis Migel Muruak esan duenez. Iñigo Galizian dago otsailetik, amarekin. Kostu handi horiek arintze aldera, Zumarraga-Urretxu Ikastolak, Goierri saskibaloi taldeak eta Secundino Esnaolak antolatu zuten kanpaina. Kontu korronte bat ere zabaldu dute, diru ekarpenak egiteko, Kutxabanken (2095 50 7450 9112857823).

Horrez gain, igande honetan kontzertu benefikoa egingo dute Zumarragako Zelai Arizti aretoan, 20:00etan hasita. Gorka Hermosa akordeoi jotzaile urretxuarra agertu da prest. Hartara, bere lehen kontzertua egin zueneko 25. urteurrena Iñigoren eta Markel Lopez mutikoaren (epidermolisi bullosa azaleko gaitza du) aldeko emanaldi benefikoarekin ospatuko du, aldi berean. Bi herri horietako musikari, aktore eta artista gehiagoren laguntza izango du Hermosak igandeko kontzertuan. Bestetik, artistek, marrazkilariek eta margolariek beren artelanak eman dituzte, saldu eta ateratako dirua tratamenduak ordaintzeko erabiltzeko. Atzo aurketu zuten saio bi familietakoek eta Hermosak, alkateekin batera.

Urretxuko 3×3 saskibaloi torneoan izen-emateekin jasotzen den dirua Iñigoren familiari emango diote. Bestetik, ekainaren 26an eta 27an ikastolako DBHko 1. eta 2. mailetakoek ikuskizun benefikoa egingo dute, 19:30ean, Zelai Arizti aretoan. Urretxuko eta Zumarragako udalei ere eskatu diete laguntza eragileek.

Iñigoren egoeraren eta kanpainaren berri maiatzaren 22an eman zuten aitak eta laguntzaileek, prentsaurrekoan.

Beasaingo Goizeresi taldean dabiltzan Gabiriako txistulariei buruz erreportajea ‘Gida’-n

Goierriko Gida hilabetekariak erreportajea eskaini dio maiatzeko zenbakian Beasaingo Goizeresi Txistulari Taldeari. Horko kide dira Gabiriako bi txistulari, Andoni Zaballos eta Iban Irazustabarrena. Beasaingo Udal Txistulari Banda izateari duela bi urte utzi zioten, elkarte gisa eratu beharrez.

Erreportajea ikusteko, klikatu hemen (PDFak).

Andoni eta Iban, Goierriko beste hainbat txistularirekin, 2010eko urtarrilean, Lazkaon./AMM

 

Gazteek egindako azken pelikula emango dute gaur

Herriko gazte talde batek aurtengo neguan grabatu duen Benemeritoak filma emango dute, gaur 22:00etan, Etxeberri kultur etxean. Udaberri Kulturala egitarauaren barruko ekitaldia da. Gattiken ekoiztetxeak egin zuen pelikula, herriko gazteak aktore dituena. Euskal Herriak independentzia lortu ondoren, guardia zibil batzuk bertsolaritzaren bidetik saiatuko dira gizartean txertatzen. Beasaingo Bertsomovieda film lehiaketara aurkeztu zuten lana. Abenduaren 31n antzerkia egin zuten, istorio berean oinarrituta.

‘Benemeritoak’ filmaren irudi bat./Gattiken

Pelikula emateaz gain, gaizki ateratako eszenen bideoa ere botako dute.

Udaberri Kulturalak bihar jarraituko du. Balentzategi herri eskolako ikasleek ikuskizuna egingo dute, 17:00etan, eliza ondoko antzokian. Antzerkia, dantza eta bertsoa uztartuta osatu dute urteroko emanaldia.

Haur abesbatzak hasi du jendaurreko ibilbidea

Gabiriako Haur Abesbatzak igandean, apirilak 28, egin zuen estreinaldia. Udaberri Kulturaleko egitarauan, eliza ondoko antzokian kantatu zuten jende aurrean lehendabiziko aldiz. Euskal errepertorioko abestiak ez ezik, afrikarrak, mexikarrak, israeldarrak eta afrikarrak ere eskaini zituzten koruko abeslariek, koreografiez eta dantza-erritmoz lagunduta. Estreinaldiko kontzertuan, Txindata musika eskolako ikasleekin batera osatua, entzulez bete zen antzokia, gehienak haurrek gurasoak eta aitona-amonak.

Haur abesbatza, kantuan, igandean./Amaia Larrañaga

Azaroan sortu zuten haur abesbatza, hamabi lagunekin. Hamabi kantari horiekin segitzen du, zazpi neskato eta bost mutiko. Miren Gurutze Plazaola oñatiarra dute zuzendari, eta ostiralero bi orduko entseguak egiten dituzte. Ekainerako musikal bat prestatzen ari dira.

Informazio gehiago, Balentzategi herri eskolaren blogean.

Txindata musika eskolakoen emanaldiko irudi batzuk:

Txindatakoak./Amaia Larrañaga

Txindatakoak./Amaia Larrañaga

Txindatakoak./Amaia Larrañaga

 

Haur koruak igandean 17:00etan egingo du estreinaldia, lehen kantaldiarekin

Herriko haur musikariek eta kantariek saio bateratua egingo dute, igandean, apirilak 28. Udaberri Kulturala egitarauaren barruko zazpigarren ekitaldian, Txindata musika eskolako ikasleek eta herriko haur abesbatzak kontzertua egingo  dute. Igandean, eliza ondoko antzokian, 17:00etan hasiko da (nahiz eta programan 18:00etan jartzen duen, ordubete aurreratu dute).

Haur koruak lehenbiziko emanaldia egin du jende aurrean. Azaroan sortu zuten, sei urtetik 12ra bitarteko hamabi partaiderekin. Miren Gurutze Plazaola oñatiarra dute zuzendari, zuzentzen dituen hainbat koruren artean (Noticias de Gipuzkoan Plazaolari elkarrizketa, martxoaren 23an).

Bertso saio musikatua gaur Murgil tabernan

Gabiriarrek kudeatzen duten Beasaingo Murgil tabernan bertso saio musikatua izango da, gaur. 22:00etan hasiko da ikuskizuna. Mantxi, Jokin Labaien, Xamoa eta Jon Martin bertsolariak ariko dira, batetik; eta Ixak Arruti eta Eneko Sierra musikariak, bestetik. Iker Iriarte da gai jartzaile.

Dhuna taldearen kontzertuaren bideoa, Goierri Telebistan

Dhuna talde goierritarrak ostiralean herrian eman zuen kontzertuaren pasarte bat da hau. Goierri Telebistak grabatu zuen. Nerea Iztueta gabiriarra, Ane Arrieta segurarra eta Irati Badiola zegamarra, kantuan. Harrera ona izan zuen entzuleen partetik. Ordubete pasatxoko saioa osatu zuten hiru goierritarrek, jendearen gozamenerako.

Dhunako kideak ere pozik geratu dira, bai ostiraleko Gabiriako kontzertuarekin, bai biharamunean Idiazabalen egin zutenarekin. Honakoa idatzi zuten Facebooken, igandean: “Asteburu bikaina izan da! Eskerrik asko bai gabiriarrei bai izaldarrei guztiagatik! Primerako harrera egin diguzue, eta gozatu egin dugu bi kontzertuetan! milesker gonbidatzeagatik, eta eskerrik asko gerturatutako guztioi!”.

Dhuna taldeak kontzertua egingo du gaur

Goierriko hiru neskak —tartean gabiriar bat— osatutako Dhuna musika taldeak kontzertua egingo du, gaur gauean, Gabirian. Eliza ondoko antzokian da, 22:00etan. Udaberri Kulturala egitarauko ekitaldia da.

Nerea Iztueta gabiriarrak abesten du, taldean. Ane Arrieta segurarra eta Irati Badiola zegamarra dira beste bi musikariak. Beraiek sortutako abestiak kantatzen eta jotzen dituzte, tresna batzuk lagun. Badiolak konposatu ditu. Kontzertuan hamar-bat pieza entzun ahalko dira.

Musika “lasaia eta goxoa” egiten dute. Otsailaren 2an jo zuten lehen kontzertua, Urretxuko KKinZona irratian. Jendaurreko lehenbiziko ekinaldia Seguran izan zuten, martxoaren 8an, Botikaxar kultur gunean. Biharamunean, martxoak 9, Urretxu-Zumarragako Gaztelekuan jo zuten.

Gabiriakoa jendaurreko hirugarren kontzertua da. Bihar, larunbata, Idiazabalen joko dute, 19:30ean, Gaztelekuan. Gozatzeko kontzertua, galdu ezinekoa!

Hau KKinZona irratian jo zuteneko bideoa da:

 

Jubilatuen egunean Kantaka abesbatzak kontzertua egingo du, igandean

Herriko jubilatuei udalak eskaintzen dien festa-eguna etzi izango da, igandean. Ohiko egitaraua du ospakizunak: 12:00etan meza, 14:00etan bazkaria (aurten Korta jatetxean), eta bi laguni omenaldia.

Meza ondoren, ordea, berritasun bat izango da: Lazkaoko Kantaka abesbatzak kontzertua egingo du, elizan bertan. Joseba Murua gabiriarrak kantatzen du koru horretan, baita zenbait ormaiztegiarrek ere. Debora Herrero Herrerok zuzentzen du.

Lazkaoko Kantaka abesbatza, 2001ean sortua./Kantaka

Santa Ageda bezperan, eskean

Ohiturari eutsiz, eta egunari hutsik egin gabe, bi talde ibili ziren atzo Santa Ageda bezperan kopla kantari, etxez etxe. Goizean, Balentzategi eskolakoak, Alegian eta Orbeldin. Arratsaldean, Osinalde elkartekoak, bertsolariak koplatan jarrita, herri gunean.

Eskolako haurrak, Gorostartzu Azpikoan./Balentzategi

Osinalde elkarteko taldea, Txokon./Hitza

 

Balentzategi herri eskolakoen argazki gehiago, bere blogean.

Kopla kantari eskean bi talde ibiliko dira bihar

Santa Ageda bezpera ospatuko da bihar, astelehena, otsailak 4. Ohiturari jarraituz, kopla kantari eskean irtengo dira herriko bi talde.

Goizean, eguraldiak baimentzen badu behintzat, Balentzategi herri eskolako haurrak eta irakasleak ibiliko dira. Lehen Hezkuntzako ikasleak irtengo dira eskera; 09:00etan abiatuko dira. Alegia eta Orbeldi auzoetako etxeetan izango dira. Herritik Alegia aldera jaitsiko dira, eta gero zentraletik gora (Altolagirretik) igoko dira gorantz.

Arratsaldean, Osinalde elkartekoak herrigunean ariko dira kopla kantari. 17:00etan hasiko dira errondan. Euxebio, Endika eta Aratz Igartzabal, eta Gorka Maiz bertsolariak ibiliko dira koplari; soinu jotzen, Asier Bidegain eta Joseba Iztueta.

 

Esne Beltza taldeak abesti bat eskaini dio Etxeberritxori

Oholtzan hainbatetan lagun izan duten Etxeberritxo pandero jotzaileari omena egin dio Esne Beltza taldeak. Eurek ondoena dakiten modura: abestuz eta musika joz. ‘Malko bakoitzeko’ kantua sortu dute, akustikoan, aurreko ostegunean hil zen Inaxio Bastida ‘Etxeberritxo’ omentzeko eta “betiko gogoan” izateko. Ekainek eman digu honen berri; eskerrik asko!

Honela dio letrak:

Bihotza doinuan

ta behatza panderoan

soinu artean bizi ta

soinurik egin gabe joan.

Gauaren babesean

ilargi gorri hortan dago

hegoak astinduz

geroz ta askeago

eta ni orain

negarrez nago

ta malko bakoitzeko

maite zaitut gehiago.

‘Etxeberritxo’ pandero jotzailea hil da

Inaxio Bastida Uranga ‘Etxeberritxo’ pandero jotzaile ospetsua gaur hil da. 70 urte zituen, eta bihotzekoak jota zendu da. Azpeitiko Etxeberritxo baserrian jaioa, Gabiriako herriarekin lotura handia zuen. Bai familiaren aldetik, bai azken urteetan denboraldi luzeak egin zituelako Gabirian bizi izaten, lanagatik.

Pandero jotzaile bezala ere saio alaiak egin zituen herrian. Abuztuaren 10ean, adibidez, San Lorentzo festako erromeria girotzen zuen, afal ondoren. Aukerarik txikiena baliatzen zuen panderoa jo eta festa jartzeko; poza eta alaitasuna zen harentzat panderoa, eta horixe transmititzen zuen.

Etxeberritxo eta Jesus Mujika./Txoko Musikala

Zazpi-bat urterekin hasi zen panderoa jotzen. Azpeiti aldeko trikitilari askorekin jo izan zuen. Joakin Errasti ‘Epelarre’ azkoitiarrarekin, adibidez, 1970eko hamarkadan asko ibili zen. 1979ko Euskal Herriko Trikiti Txapelketan finalaurrekora iritsi ziren. 1986ko martxoan Azkoitian omenaldia egin zieten biei. Ondoren, Astiazaran anaiekin ere aritu izan zen, baita Abaltzisketako Jesus Mujika trikitilariarekin ere.

Azken bi urteotan euskal musikaren punta-puntako Esne Beltza taldearekin aritu zen, agertoki handietan. Bilbon 2012ko Aste Nagusian, esate baterako, 7.000 lagunen aurrean erakutsi zuen panderoa jotzeko abildadea. Eskola zaharreko trikitilariei lekua egin zien taldeak ‘Esne zopak’ diskoan, eta Etxeberritxo izan zen belaunaldi haren ordezkari, zuzeneko hainbat emanaldi Xabi Solanoren taldearekin eginez. Bideo hau, Bilbokoa:

Beste bideo bat, Durangon 2011ko abenduan, Esne Beltzako Xabi Solanorekin:

Eskuez gain gorputz atalak eta burua iaio erabiltzen zituen panderoa astintzeko. Lan istripuengatik hainbat hatz moztu behar izan zizkioten arren, panderoa jotzeko zaletasuna eta gaitasuna ez zituen inoiz galdu.

1986ko omenaldiaz gain, 2011ko ekainaren 12an beste omenaldi bat jaso zuen Etxeberritxok, hori ere Azkoitian, Martirieta erromeria-lekuan. Iñaki Garmendia ‘Laja’ trikitilari eta Cruz Mari Alberdi ‘Poxpi’ perkusio-jotzaile azkoitiarrekin batera omendu zuten. Aurrez, 2010ean, Euskal Herriko Trikitixa Elkarteak, Azpeitiko 36 trikitilari omendu zituen, Sanjosetako jaialdian; tartean zen Etxeberritxo.

Etxeberritxoren aldeko hileta elizkizuna bihar, ostirala, 19:00etan izango da, Azpeitiko Soreasuko San Sebastian elizan.

Albistearen lotura gehiago:

• Uztarria (Azpeitiko albiste ataria).
• Berria egunkaria.
• Argia astekarian elkarrizketa (1986-3-16), Epelarreri eta Etxeberritxori.