Aztiriko IX. mendi lasterketa bihar jokatuko da, ohiko ibilbidean

Aztiriko Santa Marina jaietako bigarren kirol proba entzutetsua bihar goizean izango da, igandearekin. Aztiriko IX. Mendi Lasterketa jokatuko da, 11:00etan hasita. Ohiko ibilbidea izango dute korrikalariek, 11,5 kilometro luzekoa. Aztiri-Bat elkartearen aurretik abiatu, Lizardi Behekoraino jaitsi, handik gora Etxeaundi eta Etxetxoetara irten, eta Gaintzabalen barrenetik Legorburura, Zabaletara eta Makatzagara jaitsi, eta atzera gorantz Biurrain biak igaro, eta atzera Santa Marinako kaskora. Bi itzuli egin beharko dizkiote zirkuitu horri.
Probaren denbora-markak iaz ondu zituzten, bai gizonezkoetan (Ruben Lantz legazpiarrak), bai emakumezkoetan (Ainhoa Sanz urretxuarrak). Lehendabiziko hiru sailkatuentzat izango dira sariak, bi arloetan. Bailarako (Goierri garaia) aurrenekoentzat ere garaikurrak jarri ditu Goierri Garaia Atletismo Elkarte antolatzaileak.

Urtea	Edizioa	Gizonetan irabazlea	Denbora	Emakumeetan irabazlea	Denbora
2005	1.a*	Zuhaitz Ezpeleta	35:21	Elena Huarte	50:19
2006	2.a	Mikel Nabarro	49:26	Lurdes Intxausti	1:10:12
2007	3.a	Juanjo Igartzabal	47:22	Romy Mey	58:16
2008	4.a	Juanjo Igartzabal	47:36	Lurdes Intxausti	1:05:50
2009	5.a	Ruben Lantz	47:12	Pilar Arriola	1:07:54
2010	6.a	Juanjo Igartzabal	46:41	Rakel Aperribai
2011	7.a	Ruben Lantz	46:04	Nerea Amilibia	56:40
2012	8.a	Ruben Lantz	44:55	Ainhoa Sanz	53:48

*2005eko lehen edizioan ibilbidea 9,5 kilometrokoa izan zen; beste guztietan, 11,5 kilometrokoa.

Advertisements

Sasipilotariko finaleko beste bikotea gaur aterako da

VI. Sasipilotari txapeketa finalaren zain geratuko da, gaurkoarekin. Bigarren finalaurrekoa jokatuko dute, gaur arratsaldean, Alkainburu frontoian. Iazko txapeldunek jokatuko dute, batetik, Jon Ander Larrañaga-Eñaut Asurabarrena bikoak. Haien aurkari, Jokin Murua eta Iker Arratibel izango dira. Larrañaga-Asurabarrenak aurrekanporaketa bat gainditua dute dagoeneko; bost bikote zeuden, eta finalerdiak nork jokatu ebazteko galbahean aurrera egin zuten, Joseba Iztueta eta Oier Oiarbide alboratuta.

Abuztuaren 13ko finalean ziur izango den bikote bat, dagoeneko zain daukate: Aratz Igartzabal-Beñat Maiz bikoa. Horiek Jon eta Iban Maiz kanporatu dituzte, finalaurrekoan.

Sasierraketalarin, berriz, gaur eguerdian jokatu da lehendabiziko partida. Hamar bikote daude izena emanda. Aurrekanporaketa jokatuko dute lauren artean, eta ondoren kanporaketa modura izango da lehiaketa, eta ez hasieran pentsatu bezala bi multzotan banatutako ligaxka eran. Final-laurdenak eta finalaurrekoak jokatuko dira, horrenbestez, erraketan.

Erraketa lehiaketan Sasipilotarin baino jende gehiago apuntatu da

Sasierraketalari lehiaketa herrikoiak esku huskako Sasipilotarik baino partaide gehiago izango ditu, aurtengo udan. Erraketan 20 lagunek eman dute izena, eta antolakuntzak 10 bikote osatu ditu. Sasipilotarin, berriz, hamar lagun apuntatu dira, eta bost bikote osatu dituzte. Datorren astean hasiko dira partidak jokatzen, Alkain-Buru pilotalekuan. Finalak, bi arloetan, abuztuaren 13ko ‘Ezer ez eta festa’ egunean izango dira, arratsaldean.

Erraketako lehiaketan, hasieran bikoteak mistoak izango zirela aurreratu zuten antolatzaileek. Bost neska bakarrik apuntatu dira, ordea, eta beste bikoak mutilek osatuak izango dira. Hamar bikoteak bi multzotan bereizi dituzte, bosna bakoitzean; ligaxka eran jokatuko dute, denek denen aurka. Partidak 35 tantora izango dira, sakea 4tik 4ra; pasa 7an, baina ez da faltatzat hartuko.

I. Sasierraketalari txapelketako jokalariak, 2011n. Txapeldunordeak eta irabazleak. AMM

Multzo bakoitzeko sailkapeneko lehenengo bi bikoteek euren artean finalaurrekoak jokatuko dituzte; eta horietako irabazleek (A eta B multzoetako onenak, azken batean) finala abuztuaren 13an izango dute. Ligaxkako partida guztiak abuzturako jokatuta egon beharko dira. Ligaxkako aurreneko partidak jokatutakoan, antolakuntzak zehaztuko ditu hurrengo neurketak nork noren aurka egingo dituzten.

VI. Sasipilotari lehiaketan, berriz, hamar lagun bakarrik apuntatu dira, eta bost bikote osatu ditu antolakuntzak. Lehenbizi, bi bikotek aurrekanporaketa bat jokatuko dute euren artean, eta irabazleak jarraituko du aurrera. Geratzen diren lau bikoteek finalaurrekoak jokatuko dituzte, eta horko irabazleek finala. Iaz Jon Ander Larrañaga-Eñaut Asurabarrena bikoteak irabazi zuen pilota txapelketa, eta, horregatik, aurten ere biek elkarrekin jokatuko dute. Hain justu, aurrekanporaketa jokatzea egokitu zaie.

Aztiriko 23. Igoera txirrindularitza proba uztailaren 20an jokatuko da

Aztiriko Igoera txirrindularitza proba jokatu egingo da aurten ere. Uztailaren 20an izango da 23. Igoera, 16:00etan hasita. 2011n berreskuratu zuten lasterketa historikoa, Telleriarteko txirrindulari elkarteak antolatua. Bederatzi urtean antolatu gabe egon zen.

Junior mailako txirrindularientzat izango da Aztiriko saria. Iaz baino ibilbide samurtxeagoa prestatu dute antolatzaileek, 70,8 kilometro luzekoa. Aztiriatik abiatu, Motxorroraino neutralizatuta joan, eta Urretxuraino bi joan-etorri egingo dituzte, berotzeko. Aztiriara igoko dira jarraian, eguneko lehen zailtasuna; Zerain-Segura-Idiazabaldik buelta eginda, Ormaiztegitik gora Gabiriako herrigunera joango dira gero. Altzibarrera jaitsi, eta Ormaiztegitik barrena Atagoiti igoko dute. Motxorrotik gora, berehala, Aztiria, helmugaratzeko.

Herriko hiru mendateak gainditu beharko dituzte ziklistek: Aztiria (bi aldiz, Motxorro aldetik bietan), Gabiria (Ormaiztegitik) eta Atagoiti (Ormaiztegitik). Helmugara 17:46an iritsiko direla aurreikusten da, 40 km/h-ko abiadura bataz bestekoarekin.

Aztirian uztailaren 18tik 21erako asteburu luzean ospatuko dituzte Santa Marina jaiak. Txirrindulari lasterketa festetako osagai bat izango da.

Aztiriko Igoera 2013-7-20 ibilbidea

Judoko hastapen ikastaroa hasiko da gaur, uztailerako

Judoko hastapeneko ikastaroa ematen hasiko dira gaur, herrian. 13 urtetik gorakoentzat da. Uztailean zehar izango da ikastaro berezia, hilaren 19ra arte. Dantzalekuan jardungo dira, astelehenetan eta asteazkenetan 18:30etik 19:30era. Bukatu berri den lanurtean hasi zen judo eskaintza, estreinakoz. Ekainaren 26an bukatu zen. Hurrengo ikasturtean ere (2013-14) judo ikastaroak jarraituko du. Bai udako ikastaroan, bai urtean zeharrekoan izena emateko, Judo Legazpi taldekoekin jarri behar da harremanetan.

Sasipilotari pilota txapelketan izena emateko epea zabalik da

Herriko pilota txapelketa herrikoiaren deialdia egin dute antolatzaileek. Sasipilotari lehiaketaren VI. edizioa jokatuko da, uztailean eta abuztuan. Finala, ohi bezala, abuztuaren 13an jokatuko da, Andre Mari jai nagusien atarian, lehenengo ekialdi bezala.
Izena emateko epea ireki dute. Datorren astelehenean, uztailak 1, bukatuko da. Ostatuan eta Aztiri erretegian utzi dituzte orriak, eta horietan idatzi behar da norberaren izena. Bikoteak antolatzaileek osatuko dituzte, gero.
Sasipilotari esku huskako arloarekin batera, aurten Sasierraketalari frontenis txapelketa ere izango da, aldi berean. Aurreko urteetan ez bezala, erraketakoa mistoa izango da aurten, ez neskena soilik. Neska-mutil bikoteek jokatuko dute.
Bikoteak egiteko zozketa izena emateko epea bukatu bezain laster egingo dituztela esan dute antolatzaileek. “Jokatu beharreko partidak noiz jokatuko diren ere antolakuntzak ezarriko du aurten, eta egun horiek estuki bete beharko dira”, azaldu dute.
Izena emateko erritmoa motel samar doala, eta jendeari animatzeko eskatu diote.

Joxe Maizek irabazi du Gipuzkoako bola txapela, beteranoetan

Mailakako Gipuzkoako Bola Txapelketan Joxe Maizek beteranoetako txapela irabazi du. Segurako Txoritegi bolatokian jokatu ziren txapelketak, igandean. Maizek 48 birla bota zituen, kitarakoan (48ko zortzi izan dira denera, horietatik batzuk beteranoak). 30 bolarik parte hartu dute, eta eguneko lehiaketa Andoni Berasategi idiazabaldarrak irabazi du (49). Infantil mailan 15 urteko Joanes Agirrek irabazi du (45 birla); gazte edo jubenil mailan Jon Mendizabalek (16 urte; 43 birla); eta emakumezkoetan Garbiñe Alustizak (36). Gabiriar gehiagok parte hartu dute txapelketetan: emakumezkoetan Naiara Peñagarikanok (32) hirugarren egin du nesketan. Jubeniletan, Mikel Mandiolak (16 urte) 35 birla bota ditu, eta gazteetan hirugarren geratu da. Lehiaketa orokorrean (egunekoan) Iñaki Maizek (48), Jabier Zabaletak (48) eta Nikolas Igartzabalek (36) parte hartu dute.

Joxe Maiz, txapelarekin, Seguran.