Archive for the ‘Festak’ Category


Aztiriko Santa Marina jaietako bigarren kirol proba entzutetsua bihar goizean izango da, igandearekin. Aztiriko IX. Mendi Lasterketa jokatuko da, 11:00etan hasita. Ohiko ibilbidea izango dute korrikalariek, 11,5 kilometro luzekoa. Aztiri-Bat elkartearen aurretik abiatu, Lizardi Behekoraino jaitsi, handik gora Etxeaundi eta Etxetxoetara irten, eta Gaintzabalen barrenetik Legorburura, Zabaletara eta Makatzagara jaitsi, eta atzera gorantz Biurrain biak igaro, eta atzera Santa Marinako kaskora. Bi itzuli egin beharko dizkiote zirkuitu horri.
Probaren denbora-markak iaz ondu zituzten, bai gizonezkoetan (Ruben Lantz legazpiarrak), bai emakumezkoetan (Ainhoa Sanz urretxuarrak). Lehendabiziko hiru sailkatuentzat izango dira sariak, bi arloetan. Bailarako (Goierri garaia) aurrenekoentzat ere garaikurrak jarri ditu Goierri Garaia Atletismo Elkarte antolatzaileak.

Urtea Edizioa Gizonetan irabazlea Denbora Emakumeetan irabazlea Denbora
2005 1.a* Zuhaitz Ezpeleta 35:21 Elena Huarte 50:19
2006 2.a Mikel Nabarro 49:26 Lurdes Intxausti 1:10:12
2007 3.a Juanjo Igartzabal 47:22 Romy Mey 58:16
2008 4.a Juanjo Igartzabal 47:36 Lurdes Intxausti 1:05:50
2009 5.a Ruben Lantz 47:12 Pilar Arriola 1:07:54
2010 6.a Juanjo Igartzabal 46:41 Rakel Aperribai
2011 7.a Ruben Lantz 46:04 Nerea Amilibia 56:40
2012 8.a Ruben Lantz 44:55 Ainhoa Sanz 53:48

*2005eko lehen edizioan ibilbidea 9,5 kilometrokoa izan zen; beste guztietan, 11,5 kilometrokoa.


Herriko bi auzo nagusietako jaiak batera egokitu dira, aurten, egutegian. Aztirikoak ostegunean hasiko baldin badira (Santa Marina zaindariaren egunarekin), udalerriaren beste puntan, Alegian, ostiralean ekingo diete Madalena jaiei. Hiru eguneko egitaraua prestatu dute alegiarrek: ostiralean, larunbatean eta astelehenean (Madalena eguna) izango dira festa-osagaiak.

EGITARAUA

Uztailak 19, ostirala.

  • 19:30. Sagardo festa: sagardo dastaketa eta pintxoak.
  • 21:00. Dantzaki taldearen dantza erakustaldia: salsa, pasodoblea, tangoa…
  • Gauean. Joselu Anaiak taldearekin dantzaldia.

Uztailak 20, larunbata.

  • 16:30. Mus txapelketa.
  • 21:00. Herri afaria. Izen-ematea ohiko tokietan (28 euro).
  • Gauean. Gari eta Larrañaga trikitilariekin dantzaldia.

Uztailak 22, astelehena, Madalena eguna

  • 12:00. Meza.
  • Bukaeran. Ezkio-Itsasoko abesbatzaren emanaldi laburra.
  • Ondoren. Goruntz dantza taldearen saioa.
  • Gero. Hamaiketakoa.
  • 16:30. Umeentzat puzgarriak.
Alegiako festak 2013 kartela

Alegiako festak 2013 kartela


Aztiriko Santa Marina jaiak zaindariaren egunarekin hasiko dira aurten, ostegunean (uztailak 18), eta hurrengo astebukaerarekin bat eginda jarraituko dute. Lau eguneko egitaraua antolatu du Aztiri-Bat elkarteak. Azken urteotako ohiko egitura izango dute festek: meza eta hamaiketakoa Santa Marina egunean; auzo afaria ostiralean; futbol partida eta juniorren txirrindularitza proba larunbatean; eta mendi lasterketa igandean.

Larunbatean, beste alde batetik, iaz erabateko arrakasta izan zuen musika kontzertuak egingo dituzte. Herriko Guri5 taldeak eta Legazpiko Lortu taldeak joko dute. Txerri harrapaketa ere egingo dute, goizaldean. Txosna jarriko dute plazan, iaz bezala.

Aztiriko jaietan, iaz, Etxeaundi baserriko Juanita Iñurrategi (91 urte) omendu zuten./AMM

Aztiriko jaietan, iaz, Etxeaundi baserriko Juanita Iñurritegi (91 urte) omendu zuten./AMM

EGITARAUA

Uztailak 18, osteguna

  • 11:00. Meza.
  • Ondoren. Hamaiketakoa auzotarrentzat, Aztiri-Bat elkartean. Miren Deba eta Ander Ibarguren trikitilariak.

Uztailak 19, ostirala

  • 19:00. Kanpai joaldia eta suziri jaurtiketa, jaien hasiera iragartzeko.
  • 19:00. Bola eta toka lehiaketak, auzotarrentzat.
  • 19:30. Triki poteoa.
  • 21:00. Auzo afaria, Benta Lehor jatetxean.
  • 23:00. Olarte Anaiak trikitilariekin erromeria.

Uztailak 20, larunbata

  • 11:00. Helduen eta gazteen arteko futbol partida, Gaintzabal zelaian.
  • 13:00. Txikiteoa.
  • 16:00. Aztiriko Txirrindulari Proba, juniorrentzat. Ibilbidea eta ordutegia, HEMEN.
  • 18:00. Patata-tortilla lehiaketa. Ondoren, pintxoak, ardoa eta sagardoa.
  • 19:00. Bola eta toka lehiaketak.
  • 23:00. Guri5! eta Lortu taldeen kontzertua.
  • 05:00. Txerri harrapaketa.
  • Ondoren. Txokolate-jana.

Uztailak 21, igandea

  • 09:00. Goiz eresia Gabiriako txistulariekin.
  • 10:45. Gabiriako Udalbatzari ongietorria.
  • 11:00. Aztiriko IX. Mendi Lasterketaren hasiera. 
  • 11:00. Meza. 
  • Ondoren. Aztiriar adinekoenari omenaldia. 
  • 12:30. Goruntz dantza taldearen saioa. 
  • 13:00. Mendi lasterketako sari banaketa. 
  • 13:00. Katain eta Euzkitza trikitilariak. 
  • 18:30. Herri kirol erakustaldia. Ostola harri jasotzen, Xabier Zaldua eta Iñaki Azurmendi aizkoran. 
  • 19:00. Bola txapelketa. 
  • Ondoren. Trikitilariak. 

kartela


Aztiriko Igoera txirrindularitza proba jokatu egingo da aurten ere. Uztailaren 20an izango da 23. Igoera, 16:00etan hasita. 2011n berreskuratu zuten lasterketa historikoa, Telleriarteko txirrindulari elkarteak antolatua. Bederatzi urtean antolatu gabe egon zen.

Junior mailako txirrindularientzat izango da Aztiriko saria. Iaz baino ibilbide samurtxeagoa prestatu dute antolatzaileek, 70,8 kilometro luzekoa. Aztiriatik abiatu, Motxorroraino neutralizatuta joan, eta Urretxuraino bi joan-etorri egingo dituzte, berotzeko. Aztiriara igoko dira jarraian, eguneko lehen zailtasuna; Zerain-Segura-Idiazabaldik buelta eginda, Ormaiztegitik gora Gabiriako herrigunera joango dira gero. Altzibarrera jaitsi, eta Ormaiztegitik barrena Atagoiti igoko dute. Motxorrotik gora, berehala, Aztiria, helmugaratzeko.

Herriko hiru mendateak gainditu beharko dituzte ziklistek: Aztiria (bi aldiz, Motxorro aldetik bietan), Gabiria (Ormaiztegitik) eta Atagoiti (Ormaiztegitik). Helmugara 17:46an iritsiko direla aurreikusten da, 40 km/h-ko abiadura bataz bestekoarekin.

Aztirian uztailaren 18tik 21erako asteburu luzean ospatuko dituzte Santa Marina jaiak. Txirrindulari lasterketa festetako osagai bat izango da.

Aztiriko Igoera 2013-7-20 ibilbidea


Andre Mari eta San Roke jai nagusiak gorpuzteko eginahalean ari dira Festa Batzordeko kideak. Egitaraua ontzeko lehenengo bilera maiatzaren 22an egin zuten, eta han hainbat gai atera ziren mahai gainera. Aldaketa batzuk izango direla dirudi.

Festa egunak abuztuaren 13tik 17ra izango dira, biak barne. 13an, ‘Ezer ez eta festa’ izenarekin ezagutzen dena, Makila Jaitsierarekin hasiko da, arratsalde partean. Sasipilotari eta Sasierraketalari txapelketen finalak jokatuko dira ondoren, eta kuadrillen arteko afaria egingo da gauean. Skandalue elektro-txaranga azpeitiarrak girotuko du lehen parranda, iaz bezalaxe.

Abuztuaren 14ko egituran gauza batzuk kendu, eta beste batzuk orduz aldatuko dituzte. Egun honen “aurreko urteetako arrakasta eskasa” ikusita, Festa Batzordean “eraldatzea” pentsatu dute. Hala, arratsaldean, seiak aldera, haurren arteko futbol partidak jokatuko dira. Orain arte gauean egin izan den bertso jaialdia arratsera aurreratuko dute, “19:00ak edo 19:30a ingurura”. Bertso saioa plazan izango litzateke, aire librean, eta ez antzokian. Ondoren patata-tortilla lehiaketa kendu, eta haren ordez pintxo poteoa egitea proposatu dute, taberna, elkarte eta txosnaren artean. Gauean “ikuskizun bat” jarri nahi da, aurrekontuaren arabera; eta musika: Northern Praid talde beasaindarra (punk musika) eta herriko Guri5 erromeria girotzeko ondoren.

Abuztuaren 15a, Andre Mari, betiko egiturarekin eta osagaiekin etorriko da. Gaueko musika taldea ez dago zehaztuta, “baina erromeria izango da, ziur”. Bi talderen artean ari dira pentsatzen. Batek 15 gauean joko luke, eta besteak 16 gauean. Andre Mari arratsaldean Modesto musikaria ere izango da, haurrentzat dantzaldia girotzen.

Abuztuaren 16ak, San Roke eguna, ez du aldaketa nabarmenik izango, ezta ere. Arratsaldean, ume jolasekin batera, Escalextric handi bat muntatzeko asmoa dago, baita 17 goizean ere. Gauean rock musika kontzertua izango da, hiru talderekin: Mack Onak (Lekeitioko taldea, folk irlandarra lantzen du), Skakeitan (Donostiakoa, ska musika) eta erromeria luzatzeko berbena taldea.

San Roke Txiki egunean, azkenik, eguerdiko txikiteo-kalejira giroa berpiztu nahi da. Bola, toka eta tiragoma lehiaketekin batera, herriko trikitilariekin poteoa izango da.

Zazpi aste geratzen dira festetarako.


San Joan bezperako suak ukitu ikusgarria eta bitxia hartu zuen, igande gauean. Iluntxintan piztu zuten urteroko sua, baina inoiz ez bezalako bisita jaso zuten herritarrek: basajaunak edo jentilak agertu ziren, ardi larruz estaliak eta adarrez hornituak. Haien dantza eta errituek jantzi zuten suaren magia, txalapartaren ttakunera eta musikaren erritmora. Akelarrea, Gurutze-Bakarreko zelaian.

Hona Blanca Lopezek ateratako argazki batzuk:

This slideshow requires JavaScript.

San Joan suaren argazki gehiago, Gabiria Aurrera udal taldearen blogean.


Balentzategi herri eskolako haur, irakasle eta gurasoek Olaberrian igaro zuten atzo eguna. Gipuzkoako Eskola Txikien 26. festa ospatu zen, egun osoan. Ohiturari jarraituz, eskolako komunitateak bertan parte hartu zuen. Aurrez eskolan prestatutako mezu bat eraman zuten; oholtzan hura irakurri, gainerako 24 eskoletako mezuekin bateratu, puxika bati itsatsi, eta aireratu egin zuten.

Hainbat guraso, Olaberrian atzo./AMM

Hainbat guraso, Olaberrian atzo./AMM

Maiatzaren 25ean ere Olaberrian izan ziren gabiriarrak, arratsalde partean. Goierri mailako festa izan zen orduan.

 


Herriko musikariak eta dantzariak auzo herrian izango dira, ekitaldi bana egiten, asteburu honetan. Ezkion San Migel jaiak ospatzen ari dira. Gaur, 22:00etan, Guri5! taldeko gaztetxoek erromeria joko dute Ezkion. Igandean, 12:15ean, Goruntz dantza taldeak saioa egingo du.

Guri5! taldekoak kantatzen, azaroan Osinalde elkartean egin zen Artista Gauan./AMM

Guri5! taldekoak kantatzen, azaroan Osinalde elkartean egin zen Artista Gauan./AMM


Herriko adinekoek eta jubilatuek atzo izan zuten urteko ospakizuna, udalak beraientzat jartzen duen festa. Eguerdian meza entzun, ondoren Lazkaoko Kantaka abesbatzaren kontzertua, eta Korta jatetxera joan ziren, bazkaltzera.

Urteroko ohituran, bertan ziren eta aurretik oparirik jaso ez duten bi adintsuenek jaso dute omenaldia: Olalkiagako Juan Apaolazak eta Izar Aundiko Maria Isabel Zumalakarregik. Bazkaltzen 62 jubilatu izan ziren. Bazkalostean, Gorka Maiz eta Aratz Igartzabal bertsolariek hiruna bertso bota zizkieten. Zozketak ere egin zituzten, ardoa, loreak eta bonboiak.

Maria Isabel eta Joanito, opariekin./Jokin Murua

Maria Isabel eta Joanito, opariekin./Jokin Murua

Bazkaltzen./Jokin Murua

Bazkaltzen./Jokin Murua


Goierriko Goi Tentsioko Linearik Ez plataformak azpiegitura horren aurkako festa-egun bat antolatu du. Apirilaren 27an izango da, larunbatarekin, Seguran. Gabiriarrek han parte hartuko dute. Eguerdian informazio gunea jarriko dute, plazan. 13:00etan triki-poteoa egingo dute, eta 14:00etan bazkaria. Bazkaltzera joateko txartelak aurrez erosi beharra dago, apirilaren 23rako, asteartea. Gabirian Ostatuan eros litezke. Helduenak 15 euro balio du (menuan paella, haragi gisatua eta postrea dago), eta haurrenak 8 euro (makarroiak, solomoa eta postrea).

Bestetik, azpiegitura hori eraikitzearen aurka 400 minutuko protesta egingo da, bihar larunbata, Iruñean. Gabiriako bizilagunei hara joateko eskatu zien Gabiriako Udalak, bando bidez, martxoaren 27an. Egitaraua 11:30ean hasiko da, Gaztelu plazan, eta 18:00etan bukatu. Ekimen ugari egingo dira bien bitartean: informazio banaketa, hitzaldiak, dantzak, musika, paella erraldoia bazkaritarako… Joateko asmoa duenak Gorka Maiz zinegotziari deitu behar dio (687 104 362). Gutxieneko jende kopuru batek izena ematen badu autobusa antolatuko da. “Garrantzitsua da ahalik eta jende gehien bertaratzea”, azaldu zuen udalak bandoan.


Korrikaren 18. ekitaldia gaur hasiko da, eta herria bera zapalduko ez badu ere, ingurutik pasatuko da, jada lehen egunean. Ormaiztegitik Liernira joango da euskararen aldeko lasterketa entzutetsua, Eman euskara elkarri oihukatuz. Ormaiztegin 23:49an du ordua, eta Mutiloan 00:07an.

Korrikaren pasaera girotzeko, egunean zehar nabarituko da jai usaina herrian. Goizean Korrika Txikia egingo dute, eskola-umeek. Arratsaldean, 19:00etan pintxo-potea egingo da Ostatuan, eta 21:00etan afaria dago Osinalde elkartean. Joan nahi dutenek Gorkari edo Jokini jakinarazi behar diote. Afaltzetik, lagun artean joango dira herritarrak Ormaiztegira.


Inauteri festa ospatzeko euskal folklorean eta tradizioan oinarritutako pertsonaiak landu dituzte, aurten, Balentzategi herri eskolako neska-mutikoek. Otsailaren 8an, ostiralarekin, eliz atarian aurkeztu zituzten Euskal Herriaren luze-zabaleko inaute izakiak, eta haiekin lotutako dantzak. Mielotxin, Lesakako Zakuzahar, Zuberoako zamaltzainak, Nafarroa Behereko bolantak… Galdaragile hungariarrak ere han izan ziren. Herri eskolaren blogean bideoak jarri dituzte, inaute arratsalde euritsua nola alaitu zuten erakusteko.

Haurrak mozorrotuta, otsailaren 8an./Balentzategi herri eskola

Haurrak mozorrotuta, otsailaren 8an./Balentzategi herri eskola


Udaberriaren esnaerarekin edo etorrerarekin lotuta daude Santa Ageda bezpera eta inauteriak, adituen iritziz. Zenbaitek dioenez, biak festa beraren aldaerak dira: lurra joz natura esnarazi; negua bukatu dela ospatzeko mozorrotu, eraldatu, barren hutsu; eta deia etxez etxe zabaldu, eskean. Santa Ageda bezperako ohiturak eutsi badio ere herrian, inauterietako errondak ez. Duela iaz 60 urte ibili zen inauteri eskean azkeneko mutil taldea.

Segundo Aranburu aguazila (Urteaga, Mutiloa, 1934) da usadio hura ezagutu eta gauzatu zuen bat. “Karnabaletan etxez etxe ibiltzen ginen, kuadrilla. Dantza egiten genuen, soinua jo batek eta besteek dantza, sueltoan. Etxe atarira joan, pieza bat edo bi jo, eta martxa beste batera”, dio Segundok.

“Bastante urtean” ibili zirela gogoan du. “1955, 56, 57…  horietan ibiliko ginen. Nik orduan 20-21 urte nituen. Gu izan ginen azkenekoak. Harrezkero ez zen inor ibili. Gabonetakoak ere gurekin gastatu ziren; orduan nazimentuarekin ibiltzen zen etxerik etxe, eta guz geroztik besterik inor ibili zenik ez dut uste. Karnbaletako ohitura gurekin bukatu zen”.

(gehiago…)


Krisiak krisi, jardunaldi oparoa izan da aurten ere Santa Lutzi azoka gabiriar nekazarientzat. Urretxuko eta Zumarragako feria handian, atzo, hamabi sari jaso dituzte herritarrek. Fruta sariketetan lau (Bekoetxekoek bi, Agerreberri eta Oñatibi Txikik bana), barazkiekin hiru (Bekoetxek bi, Agerreberrik bat), haragitarako zaldi-behorrekin bat (Landeta), eta errezil sagarrekin lau (Bekoetxe, Agerreberri, Urkiola, Izar Aundi). Denera 3.700 euro, zortzi plaka eta zintzarri bat; horixe feriako sariketen etekina.

Etxeka, berriz, beste behin Bekoetxe izan da sarituena, bost sarirekin (frutarekin bi, barazkiekin bi, eta errezil sagarrarekin). Ondoren Agerreberri, hiru sarirekin (fruta, barazkiak, errezil sagarra); eta Oñatibi Txiki (fruta), Landeta (zaldiak), Izar Aundi eta Urkiola (errezil sagarrarekin hirurak) banarekin.

Aipagarria da errezil sagarretako nagusitasuna. Zumarragako sariketan, lau sarietatik laurak ekarri dituzte gabiriarrek. Sarituez gain, Oñatibi Txikikoak eta Etxeberrikoak ere sagar saltzen aritu ziren, trenbide gaineko zabalgunean. Zumarragako plazan (Legorburuko Debatarrak hestebeteak saltzen, adibidez) nahiz hango arkupeetan, Urretxuko Gernikako Arbola plazan, eta Urdaneta kalean ere egon ziren herritarrak. Astiazarango Juanito Elgarresta, berriz, larruzko abarkak egiten aritu zen, Zumarragako plazan, artisau erakusketa berezian.

Saltzaileak eta nekazariak ez ezik, ikusleak ere asko joan ziren. Horietako bisitari batek atzo Zumarragan zioen moduan, “Gabirikok falta balie, kitto Santa Lutzi ferie”.

Gabiriarrak, saltzen eta feria ikusten, atzo./AMM

Gabiriarrak, saltzen eta feria ikusten, atzo./AMM


Hiru eguneko egitaraua prestatu du herriko talde batek Balentzategi eskola dagoen eraikinaren ehun urteak gogoratzeko. Azaroaren 24an bete zuen mendea Oroitz-Ona izena duen eskola-etxeak. Ospakizunak abenduaren 14an, 15ean eta 16an izango dira, ostiraletik igandera. Hitzaldi, ikus-entzunezko, antzerki, solasaldi eta oroimen ekitaldiez gain, bi egunetan —larunbat-igandeetan— erakusketa egongo da, Dantzalekuan; eskola-materialak, liburuak, tresnak eta argazkiak jarriko dituzte, lehenagokoak nahiz gaur egungoak. Antolatzaileek herritarrei eskatu diete argazki zaharrak uzteko.

Egitaraua:

Abenduak 14, ostirala

  • 14:15-16:00. Ate irekiak eskolan. ‘Lehengo eta oraingo jolasak’ solasaldia eta jolasaldia, eskolako haurrekin batera.
  • 19:00. ‘Eskola bizia, herri bizia’ DVDaren emanaldia, kultur etxean. Lanaren ekoizle Iñaki Alkalde bertan izango da, solasaldirako.

Abenduak 15, larunbata

  • 11:00-14:00 eta 17:00-20:00. Ate irekiak eskolan. Antzinako eta oraingo materialen zein argazkien erakusketa, Dantzalekuan.
  • 17:00. Kafe tertulia, Erbie elkartean: ‘Eskola, lehen eta orain’.

Abenduak 16, igandea

  • 11:00-14:00 eta 17:00-20:00. Ate irekiak eskolan. Antzinako eta oraingo materialen zein argazkien erakusketa, Dantzalekuan.
  • 13:00. Mendeurreneko oroimen ekitaldia.
  • 18:00. Ikasleen eta ikasle ohien ikuskizuna, antzokian.

 

Erakusketa Eguberri egunean ere zabalduko dute, abenduaren 25ean, 13:00etatik 14:00etara.

Oroitz-Ona eskola-etxea, Eustakio Balentzategiren diruz egina eta 1912an irekia./AMM

Oroitz-Ona eskola-etxea, Eustakio Balentzategiren diruz egina eta 1912an irekia./AMM