Archive for the ‘Lehiaketak’ Category


Osinalde bertso sariketaren 42. ekitaldirako osagai guztiak eltzean daude. Bihar, larunbata, jokatuko da sariketa, sei bertsolari gazterekin. Afaria 20:30ean hasiko da, eta ondoren izango da bertso saioa, 22:30-23:00ak aldera. Afaritarako txartel guztiak salduta daude. Saioa entzuteko, sarrera libre da.

Aurrez jokatu diren hiru sarieketetan bina lagunek jaso zuten Gabirian aritzeko txartela. Argi-Berritik (martxoak 9) Josu Oiartzabal azpeitiarra eta Nekane Zinkunegi errezildarra etorriko dira; Osinberdetik (martxoak 16) Iñaki Aleman iruritarra eta Nerea Ibartzabal markinarra; eta Aztiritik (martxoak 23) Peio Ormazabal arrigorriagarra eta Imanol Uria algortarra.

Saioa 42.a den arren, irabazlea 41.a izango da, 1996an ez zelako sariketa izan, 25. urteurreneko saio berezia baizik. Garaile guztiak, hemen.


Aztiri bertsolari sariketa larunbat gauean jokatu zen, auzo hartako Aztiri-Bat elkartean. Sei bertsolari gazte kantuan, eta hiru behintzat protagonista, izen propioz. Aztiri saria, entzuleen irudiko gaueko bertsolari onena izan dena, bozketa herrikoiz, Eneritz Artetxe azkoitiarrak jaso zuen. Hark jaso zuen boto gehien, entzuleen partetik. Epaimahaikoaren iritzia, ordea, bestelakoa izan zen. Osinalde sariketara pasea eman zien bi bertsolarien artean ez zen sartu Artetxe. Epaileek —ezkutuan aritzen dira lanean— Peio Ormazabal arrigorriagarra eta Imanol Uria algortarra apartatu zituzten, aurrerako.

Ezkerretik eskuinera, Aztirian aritu ziren seiak: Eneritz Artetxe, Imanol Irazustabarrena, Joanes Etxebarria, Imanol Uria, Maddi Ane Txoperena eta Peio Ormazabal./Eneritz Gorrotxategi – Osinalde elkartea

Ezkerretik eskuinera, Aztirian aritu ziren seiak: Eneritz Artetxe, Imanol Irazustabarrena, Joanes Etxebarria, Imanol Uria, Maddi Ane Txoperena eta Peio Ormazabal./Eneritz Gorrotxategi – Osinalde elkartea

Jokin Matxinandiarenak aurkeztu zuen saioa. Koplak kantatzeko Miren Deba eta Ander Ibarguren trikitilarien laguntza izan zuten. Zortziko nagusian eta zortziko txikian binaka, hamarreko txikian ofiziotan, bina punturi erantzuten bakarka, gaia emanda bi bertso eta koplatan aritu ziren. Guztiak ere “txukun” aritu ziren, antolatzaileen esanetan. Afaltzen 80 lagun izan ziren, Aztiri-Bat elkartean. Ondoren, saioa entzutera jende gehiago sartu zen.

Osinalde sarian kantatzeko saikoa osatzeko, Aztiriko bi sailkatuen izenak jakitea besterik ez zen falta. Hala, apirilaren 6an honako sei gazteak ariko dira Osinalde elkartean: Josu Oiartzabal azpeitiarra eta Nekane Zinkunegi errezildarra (Ordiziako Argi-Berrin sailkatuak), Iñaki Aleman iruritarra eta Nerea Ibartzabal markinarra (Zaldibiako Osinberden), eta Peio Ormazabal eta Imanol Uria (Aztirian). Hiru bizkaitar, bi gipuzkoar eta nafar bat, Osinaldeko 41. irabazlea izateko hautagai.


Herriko gazteek eta Gattiken ekoiztetxeak prestatu duten film laburrak ezin izan du iazko saria errepikatu, aurten. Beasaingo Bertsomovieda lehiaketan, atzo bukatu zen Internet bidez botoa emateko epea, astebeteren ondoren. Gabiriarren lana bigarren geratu da, bozkatuenen zerrendan. Boto gehien Oñatiko Badator munizipala ikus-entzunezkoak jaso ditu, 950 inguru. Benemeritoak 900en azpitik geratu dira. Ostiralera arte zerrendan buru zeuden gabiriarrak, baina asteburuan irauli dute oñatiar internautek emaitza. Saria, 15 lagunentzat sagardotegian otordua da.

Oraindik, ordea, sari nagusia izendatzea geratzen da. Hori antolatzaileek egingo dute, epaimahaiko baten bidez. Hautagai nagusia Benemeritoak da, iaz bezala sari nagusia eramateko. Lehengo urtean, erdibanatu egin behar izan zuten sari hori. Aurten, bi sari eramateko arriskurik ez dutenez dagoeneko, ea.

Youtube-n dago film laburra. Dagoeneko 2.800 lagunek baino gehiagok ikusi dute.


Aurten herriko bertsolari talderik ez da ariko Martxoan Bertsoa bertsolari lehiaketa herrikoiaren finalean. Inoizko partaidetza jendetsuena izan arren, hori. Hiru talde osatu ziren herrian, Gabirisprint I, II, eta III.

Hala ere, herritarren ordezkaritza izango da finalean: Maialen Akizu Bidegainek kantatuko du, Kontuz Atsuak taldean, Itziar Pildainekin eta Amaia Iturriotzekin. Beste bi talde finalistak Maneksen Banda (Manex Mantxola, Antton Fernandez eta Gaizka Oiartzabal Pitillo), eta Tzitzarito (Mikel Iturriotz, Jon Mendizabal, Jon Gurrutxaga) dira.

Finala ostiralean da, etzi, martxoak 22. 23:00etan hasiko da, Urretxuko Gaztelekuan.

Martxoan Bertsoko laugarren eta azken kanporaketa larunbatean jokatu zen, Legazpiko gaztetxean. Saioko emaitzak jakin orduko itxi zen sailkapen nagusia ere, eta lehen hirurek lortu zuten txartela.

Gabirisprint3 taldekoak, aurtengo lehiaketan errebelazioa. Finalaren atarian geratu dira, laugarren. Foxen kantatu zuten, ostiralean.

Gabirisprint3 taldekoak, aurtengo lehiaketan errebelazioa. Finalaren atarian geratu dira, laugarren. Foxen kantatu zuten, ostiralean.

Hamabi taldek parte hartu dute Martxoan Bertsoan, aurten. Horietatik hiru gabiriarrak. Denera hamar bertsolari gabiriar aritu dira.

Sailkapen nagusia nola geratu den:

  1. Kontuz Atsuak (Amaia Iturriotz, Maialen Akizu, Itziar Pildain): 193,65 puntu.

  2. Maneksen Banda (Manex Mantxola, Gaizka Oiartzabal Pitillo, Antton Fernandez): 185.

  3. Tzitzarito (Mikel Iturriotz, Jon Mendizabal, Jon Gurrutxaga): 184,25.

  4. Gabirisprint3 (Aitzol Iturbe, Iban Maiz Banagas, Eñaut Asurabarrena Gaztie): 181,75.

  5. Urola Garaiko Selekzioa (Beñat Torres, Julen Agirreburualde, Manex Agirrezabal): 181.

  6. Bi eta Bat (Aitor Lizarazu Ginz, Urko Egaña, Beñat Zamalloa): 180,7.

  7. Atzeko Kaleko Mutilak (Asier Sasieta, Xabier Elgarresta, Gorka Santesteban): 180,25.

  8. Gabirisprint2 (Gorka Maiz Pastel, Mikel Asurabarrena, Oier Oiarbide): 178,5.

  9. Gabirisprint1 (Jokin Murua, Aratz Igartzabal Potto, Endika Igartzabal): 177,7.

  10. Trasteroko Morroiak (Gorka Ojanguren, Zaldua, Jaka): 177,5.

  11. Potato Barria (Asier Otamendi, Rikardo, Serapio): 177.

  12. Udanako Kurbak (Ulises, Asier Iriondo, Gorka Azkarate): 167,75.


Osinalde bertso sariketaren 42. ekitaldia ari da bertsolariz hornitzen. Hiru kanporaketatatik bi jokatu dira, eta lau bertsolariren izenak jakinak dira dagoeneko. Azkeneko bi finalistak Aztiri Sarian izendatuko dituzte, larunbatean.

Martxoaren 9an Ordiziako Argi-Berri saritik Josu Oiartzabal azpeitiarra eta Nekane Zinkunegu errezildarra sailkatu ziren. Aurreko larunbatean, martxoak 16, Zaldibiako Osinberde estreinako sariketan Iñaki Aleman iruritarrak eta Nerea Ibartzabal markinarrak lortu zituzten jokoan ziren bi txartelak.

Iñaki Aleman iruritarra, Osinberden irabazle.

Iñaki Aleman iruritarra, Osinberden irabazle.

Argi-Berriko seikoa. Ezkerretik lehena Zinkunegi, mikroarekin Oiartzabal.

Argi-Berriko seikoa. Ezkerretik lehena Zinkunegi, mikroarekin Oiartzabal.

Larunbatean, hilak 23, Aztiri-Bat elkartean da bertsolaritzaren festa. Afaria 20:30ean hasiko da, eta ondoren izango da saioa, Jokin Matxinandiarenak aurkeztuta. Honako seikoa ariko da kantuan: Maddi Ane Txoperena (Hendaia), Imanol Uria (Algorta), Eneritz Artetxe (Azkoitia), Peio Ormazabal (Arrigorriaga), Imanol Irazustabarrena (Alegia, Gipuzkoa) eta Joanes Etxeberria (Barkoxe).

 


Herriko gazte talde batek eta Urretxu-Zumarragako Gattiken ekoiztetxekoek aurten ere film labur ikusgarri bat egin dute. Beasaingo Bertsomovieda bertso-bideo lehiaketarako prestatu dute Benemeritoak. Iazko azaroan Zarautzen estreinatu zuten antzezlanaren moldaera da, 24:34 minutuko iraupeneko ikus-entzunezkoa. Antzerki hori bera Urtezahar egunean antzokian egin zuten.

Bertsomoviedan gaur, astelehena, zabaldu dute Interneteko erabiltzaileentzat botoak emateko aukera. Sari herrikoia boto gehien jasotzen duen lanak eskuratuko du. Iaz gabiriarrek epaimahaiaren sari nagusia irabazi zuten, Bertso Road Movie lanarekin, eta Urpekoak filmarekin erdibana. Bozketa herrikoian egurra eman zuten gabiriarrek, eta saria beraientzat izan zen, sagardotegian otordu bat.

Hemen bozkatu Benemeritoak filma, bideoaren azpiko hatzean klikatuta. Igandera arte (martxoak 24) dago horretarako epea.


Beste urtebetez, Gabiriako Rallyesprintak zabalduko du Euskal Herriko automobilismo denboraldia. Egutegiko aurrenko proba ofiziala da, eta igandean jokatuko da, martxoak 3, 15:00etan hasita. Ohi bezala, hiru erlojupeko egingo dituzte, iaz bezala Motxorro (Legazpi)-Gabiria norantzan. 6,65 kilometroko bide zatia izango da, betikoa.

Kartela

Krisiak eragina izan badu ere, parte-hartze dotorea izango da, bai kopuru aldetik (51 talde daude izena emanda), bai maila aldetik. Aurreko urteetako partaidetzaren azpitik geratu da, hala ere. Egoera orokorra ikusita, “gustura egoteko moduan” direla esan du Euskal Automobilismo Federazioaren lehendakari Angel Gurrutxagak.

PARTAIDEAK

Lau Mitsubishi eta 15 BMW daude, tartean. Faboritoen sailean Joxe Labaka (iazko euskal rallyetako txapelduna), David Ardions (iaz lehen mangan denbora onena egin zuen, eta helmugaratu ostean kolpe bat hartuta erretiratu beharra eduki zuen), Iban Tarsicio edota Jon Davoz daude, laurak Mitsubishiekin. Gorka Antxustegi, Suzuki rally taldeko pilotu ofiziala, bertan izango da, Peugeot 205 F2000 ahaltsuarekin. Baita Txus Jaio ikusgarria ere (BMW 320i), edo Aingeru Castro (BMW M3) eta Iñaki Alberdi (BMW M3).

Aurkezpen ekitaldia asteartean egin zuten, Korta jatetxean. Han izan ziren Lagun Artea eskuderia antolatzaileko Jorge del Cid eta Joxe Antonio Araneta, Gabiriako Udaleko zinegotzi Gorka Maiz, Legazpiko alkate Kepa Urtzelai (aurten lehenbiziko aldiz babesa agertu du Legazpik), Angel Gurrutxaga , Lontxo Ormazabal Kortako ordezkaria, eta David Ardions gidaria.

Aurkezpen prentsaurrekoan izan ziren antolatzaileak, babesleak eta gidariak./Eduardo Maturana-EAF

Aurkezpen prentsaurrekoan izan ziren antolatzaileak, babesleak eta gidariak./Eduardo Maturana-EAF

Lehen taldea, Joxe Labaka-Aitor Otaegi, 15:00etan irtengo dira. Kamiño Zaharra (Gi-3540 errepidea), lasterketa jokatzen dena, goizeko 10:00etan itxiko dute. Barruan ez dute aparkatzen utziko. Zirkulazio aldetik mugapenak izango dira. Ormaiztegitik soilik igo ahalko da Gabiriara, norantza bakarrekoa izango da errepide hori. Aparkatu ahalko da bide horretan, bazter batean. Herritik irteteko, kaskotik barrena Alegia alderantz jaitsi beharko da.


Aurten ere ukitu gabiriarra benetakoa izango du Urretxu-Zumarragako bertso eskolakoek antolatzen duten Martxoan Bertsoa lehiaketa herrikoiak. Gabiriarrek osatutako hiru talde izango dira partaide, XI. ekitaldian; bederatzi bertsolari-bertsogile-bertsozale-bertsogin. Horiez gain, gabiriar jatorriko beste bi ere badira, beste bi taldetan.

Martxoaren 8an hasiko da lehiaketa, eta aurten kanporaketa bat gutxiago izango du: lau denera. Bi asteburutan jokatuko dira laurak, eta martxoaren 22rako, ostirala, utzi dute finala, ohi bezala Urretxuko Gaztelekuan.

Herritarrek antolatu dituzten hiru taldeak hauexek dira:

  • Jokin Murua, Endika Igartzabal eta Aratz Igartzabal. Martxoaren 8an, ostirala, Urretxuko Motz tabernan kantatuko dute, 23:00etan.
  • Oier Oiarbide, Mikel Asurabarrena eta Gorka Maiz. Martxoaren 9an, larunbata, Ezkioko Igartubeiti baserrian, 18:30ean.
  • Iban Maiz, Eñaut Asurabarrena eta Aitzol Iturbe. Martxoaren 15ean, ostirala, Urretxuko Fox tabernan, 23:00etan.

Beste herritarrak, Aitor Lizarazu (Aretxabaletako bi lagunekin ariko da), eta Maialen Akizu (Amaia Iturriotz eta Itziar Pildain taldekide) dira. Horiek martxoaren 8an kantatuko dute.

Saio bakoitzeko bertsolariak ikusteko, agendara joan.

Martxoan Bertsoan behin baino gehiagotan irten dira gabiriarrak txapeldun. 2011n Jokin Murua, Gorka Maiz eta Oier Oiarbide izan ziren irabazle. Iaz, Endika, Gorka eta Mikel Asurabarrena txapeldunorde geratu ziren, dezima batzuengatik. 2010ean, Aitor Lizarazu eta Ander Kerejeta lehengusuen Tupis Tupau taldeak irabazi zuen, Manex Mantxolak hirukoa osatuta (2008an bigarren); 2009an Jokin, Oier eta Endika Igartzabal garaile.

Halako harrobiarekin, herrian bertan ere bertso-festa jartzen ez legoke zaila. Martxoan Bertsoko txapeldun sorta, behean (argazkiak: Zumarraga-Urretxuko Bertso Eskola).

This slideshow requires JavaScript.

 


Lehengoan bit hauen artean ipini genuen Rufino Iraolak Osinalde bertso sariketari buruz esandakoa. Sariketaren antolatzaileei buruz, hobeto esan. Hauxe idatzi zuen Twitter-en: “Badute meritua Eusebio Igarzabalek, Iñaki Muruak eta abarrek, eurak pentsatzen duten baino gehiago estimatzen ditut”.

Gaur, Goiberri astekarian, eskualdeko beste bi bertsolarik loretan blaitu dute herriko lehiaketa entzutetsua. Nerea Elustondo legazpiarrak: “Lehiak lehia, bada ordea nola Martxoan Bertsoan hala Osinalde sariketan errepikatzen den beste faktore bat: giroa. Prestigio eta tradizio handiko sariketa da Osinalde. Ziur, aurten ere, gogoratzeko moduko une bat baino gehiago utziko dizkigutela bertsolari gazteek”.

Gorka Azkarate urretxuarrak, erantzunean: “Zer esan Osinalde sariketaz. Hamarkadak daramatzate Gabiria aldean bertsolari gazteentzat Euskal Herri mailan erreferentzia den sariketa hau antolatzen”.

Bide batez, Elustondok eta Azkaratek hizpide dituzten martxoko bertso lehiaketetean (Goierri garaiko ‘Martxoan Bertsoa’, Beasaingo ‘Bertsomovieda’ film lehiaketa, eta Gabiriako Osinalde, aurreko saio guztiekin), guzti-guztietan gabiriarrak ariko dira. Lehen bietan parte-hartzaile; herriko sariketan, kuriosoki, antolatzaile gisa bakarrik aurten.


Osinalde sariketaren palmaresa, urtez urte.

Abizenean klikatuta, Bertsozale Elkartearen datu basera irispidea, bakoitzaren biografia, bertso-lanak eta bertsolari-ibilbidea ikusteko.

IRABAZLEEN ZERRENDA

  1. 1971, Patxi Iraola (Zaldibia).
  2. 1973, Luis Otamendi (Aia).
  3. 1974, Xabier Zeberio (Itsasondo).
  4. 1975, Joxe Izagirre Attola (Azkoitia).
  5. 1976, Mikel Mendizabal (Itsasondo).
  6. 1977, Juan Inazio Begiristain (Ataun).
  7. 1978, Jose Luis Mugartza Elgetzu (Mallabia).
  8. 1979, Xabier Arrizabalaga Ziarda (Elgoibar).
  9. 1980, Millan Telleria (Albiztur).
  10. 1981, Xalbador Laka (Ondarroa).
  11. 1982, Jon Sarasua (Aretxabaleta).
  12. 1983, Xabier Perez Euzkitze (Azpeitia).
  13. 1984, Juan Jose Eizmendi Loidisaletxe II.a (Errezil).
  14. 1985, Pablo Joxe Aristorena (Hernani).
  15. 1986, Joxe Mari Izeta (Usurbil).
  16. 1987, Xabier Narbarte (Lazkao).
  17. 1988, Joxe Ramon Elortza (Ormaiztegi).
  18. 1989, Joxe Munduate (Ataun).
  19. 1990, Bernardo Azpillaga (Errezil).
  20. 1991, Igor Elortza (Durango).
  21. 1992, Maialen Lujanbio (Hernani).
  22. 1993, Aitor Sarriegi (Beasain).
  23. 1994, Pablo Suberbiola (Lasarte).
  24. 1995, Bixente Gorostidi (Amezketa).
  25. *1996, 25. urteurreneko saioa (lehiaketarik ez).
  26. 1997, Jexux Mari Irazu (Larraul).
  27. 1998, Nahikari Gabilondo (Zarautz).
  28. 1999, Arkaitz Goikoetxea (Oiartzun).
  29. 2000, Nerea Elustondo (Legazpi).
  30. 2001, Ainhoa Agirreazaldegi (Bergara).
  31. 2002, Iker Zubeldia (Zegama).
  32. 2003, Iñaki Apalategi (Beasain).
  33. 2004, Oihana Bartra (Bilbo).
  34. 2005, Aritz Aranburu (Zarautz).
  35. 2006, Iban Urdangarin (Ataun).
  36. 2007, Aitzol Barandiaran (Ataun).
  37. 2008, Uxue Alberdi (Elgoibar).
  38. 2009, Maddalen Artzallus (Hendaia).
  39. 2010, Mikel Artola (Alegia).
  40. 2011, Ane Labaka (Lasarte).
  41. 2012, Amaia Iturriotz (Urretxu).

*1972an ez zen antolatu, eta 1996an mende laurdena ospatzeko saioa egin zen (ez lehiaketa), ordura arteko partaide batzuekin.


Osinalde bertso sariketaren 42. ekitaldia gorpuztu dute antolatzaileek. Ohi bezala, Errege egunaren hurrengo egunean (urtarrilaren 7a astelehena zen aurten) elkartu ziren. Azken urteetako egitura bera edukiko du lehiaketak: aurrez hiru saio jokatuko dira, seina bertsolari ariko dira bakoitzean, bertsolari gazteak dira, eta afaria izango da aurretik. Tokiei dagokienez, aldaketa garrantzitsu bat badago, hala ere: Idiazabalgo Axari sariketa desagertu egingo da, eta haren lekua Zaldibiako Osinberde sariak hartuko du. Ordiziako Argi-Berri eta Aztiri dira gainontzeko bi sariak.

Bakoitzetik bina bertsolari sailkatuko dira, epaimahaiak puntuz izendatuak, Osinaldeko finala jokatzeko. Saio bakoitzean, entzuleek sarituko dute gaueko bertsolari gustukoena, lekuan lekuko garaikurra emanez: Ordizian Txikia saria, Aztiri saria herriko auzoan, eta berdin Osinberden. Aurretiazko saioak martxoan zehar jokatuko dira. Argi-Berrikoa hasiko da, martxoaren 9an; Osinberde hurrengoa, hilaren 16an, eta Aztirikoa azkena, martxoaren 23an. Osinalde sariketa apirilaren 6an da. Guztiak larunbatak dira.

Sarean dagoeneko ari da sariketa girotzen. Rufino Iraolak Twitterren antolatzaileak goraipatu ditu: “Badute meritua Eusebio Igarzabalek, Iñaki Muruak eta abarrek, eurak pentsatzen duten baino gehiago estimatzen ditut”.

Saioz saio, bertsolari hauexek ariko dira kantuan. Aurten ez dago gabiriarrik. Goierritarra ere bakarra. Antolatzaileek asko begiratzen diote lurraldetasunari, eta aipagarria da aurten sei euskal herrialdetako bertsolariak ariko direla: gipuzkoarrak 8; bizktaitarrak 3; nafarrak, arabarrak eta lapurtarrak bina; eta zuberotarra bat.

1. Argi-Berri Saria (martxoak 9, Argi-Berri elkartea, Ordizia. 20:30ean afaria)

  • Aitzol Iturbe (Antzuola, Gi).
  • Josu Oiartzabal (Azpeitia, Gi).
  • Ainhoa Comas (Amurrio, A).
  • Paula Amilburu (Aramaio, A).
  • Aitor Salegi (Zestoa, Gi).
  • Jokin Bergara (Eibar, Gi).

2. Osinberde Saria (martxoak 16, Osinberde elkartea, Zaldibia. 20:30ean afaria)

  • Iñaki Aleman (Irurita, Na).
  • Nerea Ibarzabal (Markina-Xemein, Bi).
  • Josu Sanjurjo (Lesaka, Na).
  • Nekane Zinkunegi (Errezil, Gi).
  • Maindi Murua (Azkaine, La).
  • Joanes Etxaide (Zegama, Gi).

3. Aztiri Saria (martxoak 23, Aztiri-Bat elkartea, Aztiria. 20:30ean afaria)

  • Maddi Ane Txoperena (Hendaia, La).
  • Imanol Uria (Algorta, Bi).
  • Eneritz Artetxe (Azkoitia, Gi).
  • Peio Ormazabal (Arrigorriaga, Bi).
  • Imanol Irazustabarrena (Alegia, Gi).
  • Joanes Etxeberria (Barkoxe, Zu).

4. Osinalde Saria: apirilak 6, Osinalde elkartea, Gabiria. 20:30ean afaria. Aurreko hiru saioetan sailkatutako bina bertsolarirekin.

Bien bitartean, iazko Osinalde sariko (2012-4-14) bideoa gozagarri, Gotzon Aranburu kazetariak egina:


Aurreko ostiral gauean Ostatuan jokatu zen Korrika-18ren harira Gipuzkoako II. Mus Txapelketa. Herriko kanporaketa zen. Asier Agirre eta Jon Ugalde izan ziren irabazle, eta horiek ordezkatuko dute herria Goierriko kanporaketan, martxoaren 2an Legorretan. Bigarren Mikel Asurabarrena eta Joseba Iztueta izan ziren. Denera sei bikotek parte hartu zuten.


Euskal Automobilismo Federazioak atzo zabaldu zuen Gabiriako XV. Rallyesprintaren aurrerapena, ofizialki. Atzera-kontua hasi da. Martxoaren 3an jokatuko da, 15:00etan hasita. Betiko errepidean (Gi-3540, Kamiño Zaharra), 11.05 kilometro puntuan edukiko du irteera marra, eta 4.40 km-an helmuga. Hau da, Motxorro-Korta norantzan joango dira lasterketako autoak, iaz bezala. Hiru tramo izango dira erlojupean, bakoitza 6,65 kilometro luzekoa. Denera 19,95 km kronoaren aurka, eta ibilbide osoa (itzuli osoa barne hartuta) 70 km-koa.

Euskadiko Rallyesprint Txapelketarako baliagarria izango da, baita Gipuzkoako Rallye Txapelketarako eta Euskadiko Rallyesprinteko Formula Libre Koparako ere. Izena emateko epea otsailaren 22ra arte dago zabalik (hilaren 6an zabaldu zuten), Lagun Artea eskuderia antolatzailearen bitartez (tel: 689 66 40 70. Faxa: 943 15 16 45). Behin-behineko partaide zerrenda otsailaren 27an jakinaraziko dute.


Hilabete falta da Korrika 18 ekimena herri ingurutik igaro dadin, martxoaren 14ko gauerdian. Aurrez, eta euskararen aldeko azpiegiturak hobetzen laguntzeko, mus txapelketa antolatu dute. Herrian ere jokatuko da, bertako kanporaketa. Ostiralean (otsailak 15), 21:30ean da, Ostatuan. Bikoteko sarrera-prezioa 20 12 euro izango da. Aurreneko bikoteek Gipuzkoako finalean aritzeko txartela lortuko dute, sariez gain.

Duela bi urte ere jokatu zen Korrikaren aldeko mus txapelketa. Mila eta Aritz aztiriarrek irabazi zuten.


Oso gutxitan ikusten den joko altuarekin, Iñaki Maiz bolariak irabazi zuen, igandean, binakako Gipuzkoako bola txapelketako bigarren jardunaldiko saioa, bakarka. Eguneko tiraldian bera izan zen jaun eta jabe, Aian (Gipuzkoa). Zortzi tiralditan 50 puntu atera zituen. Bi zazpiko bota zituen, jarraian. Beste guztiak, seikoak.

Sailkapen orokorrean laugarren postura igo dira, Iñaki Maiz eta Jabier Zabaleta (186 puntu), liderrengandik bi puntura. Iñaki Etxezarreta-Felix Maiz ere gorantz joan dira, eta 12. daude (176). Hirugarren bikotea, Nikolas Igartzabal-Joxe Maiz, 22. postuan geratu dira (160).