Archive for the ‘Kontzertuak’ Category


Iñigo Murua gabiriar jatorriko mutikoaren alde eta Markel Lopez urretxuarraren alde kontzertu benefikoa egin zen, atzo, Zumarragako Zelai Ariztin. Gorka Hermosa soinu-jotzaileak antolatu du, eta harekin batera Urretxuko nahiz Zumarragako artistak aritu ziren: dantzak, musika joz edo kantatuz,… Gotzon Aranburu kazetariak bideoa editatu du ikuskizunarekin.


Gabiriako Haur Abesbatzak bere historia laburreko bigarren emanaldia larunbatean egingo du, ekainak 15. Xomorroak izeneko ikuskizuna egingo dute. Saioa 18:00etan hasiko da, eliza ondoko antzokian. Abesbatza iazko azaroan sortu zuten, eta apirilaren 28an izan zuten estreinaldia jende aurrean, antzoki berean.

Kartela


Urretxun eta Zumarragan maiatzaren 22tik abian da Tantaz tanta, lagundu Iñigo izeneko elkartasun kanpaina. Gabiriar jatorriko Iñigo Murua 14 urteko mutikoari laguntzeko da. Jaio aurretik buruko infartoa eduki zuen, eta ondorio neurologikoak utzi zizkion. Otsailaz geroztik Santiagoko (Galizia) erietxe batean terapia jasotzen ari da, eragin positiboarekin. Tratamendua garestia da, ordea; hilean 3.000 euro, mutikoaren aita Luis Migel Muruak esan duenez. Iñigo Galizian dago otsailetik, amarekin. Kostu handi horiek arintze aldera, Zumarraga-Urretxu Ikastolak, Goierri saskibaloi taldeak eta Secundino Esnaolak antolatu zuten kanpaina. Kontu korronte bat ere zabaldu dute, diru ekarpenak egiteko, Kutxabanken (2095 50 7450 9112857823).

Horrez gain, igande honetan kontzertu benefikoa egingo dute Zumarragako Zelai Arizti aretoan, 20:00etan hasita. Gorka Hermosa akordeoi jotzaile urretxuarra agertu da prest. Hartara, bere lehen kontzertua egin zueneko 25. urteurrena Iñigoren eta Markel Lopez mutikoaren (epidermolisi bullosa azaleko gaitza du) aldeko emanaldi benefikoarekin ospatuko du, aldi berean. Bi herri horietako musikari, aktore eta artista gehiagoren laguntza izango du Hermosak igandeko kontzertuan. Bestetik, artistek, marrazkilariek eta margolariek beren artelanak eman dituzte, saldu eta ateratako dirua tratamenduak ordaintzeko erabiltzeko. Atzo aurketu zuten saio bi familietakoek eta Hermosak, alkateekin batera.

Urretxuko 3×3 saskibaloi torneoan izen-emateekin jasotzen den dirua Iñigoren familiari emango diote. Bestetik, ekainaren 26an eta 27an ikastolako DBHko 1. eta 2. mailetakoek ikuskizun benefikoa egingo dute, 19:30ean, Zelai Arizti aretoan. Urretxuko eta Zumarragako udalei ere eskatu diete laguntza eragileek.

Iñigoren egoeraren eta kanpainaren berri maiatzaren 22an eman zuten aitak eta laguntzaileek, prentsaurrekoan.


Herriko musikariak eta dantzariak auzo herrian izango dira, ekitaldi bana egiten, asteburu honetan. Ezkion San Migel jaiak ospatzen ari dira. Gaur, 22:00etan, Guri5! taldeko gaztetxoek erromeria joko dute Ezkion. Igandean, 12:15ean, Goruntz dantza taldeak saioa egingo du.

Guri5! taldekoak kantatzen, azaroan Osinalde elkartean egin zen Artista Gauan./AMM

Guri5! taldekoak kantatzen, azaroan Osinalde elkartean egin zen Artista Gauan./AMM


Gabiriako Haur Abesbatzak igandean, apirilak 28, egin zuen estreinaldia. Udaberri Kulturaleko egitarauan, eliza ondoko antzokian kantatu zuten jende aurrean lehendabiziko aldiz. Euskal errepertorioko abestiak ez ezik, afrikarrak, mexikarrak, israeldarrak eta afrikarrak ere eskaini zituzten koruko abeslariek, koreografiez eta dantza-erritmoz lagunduta. Estreinaldiko kontzertuan, Txindata musika eskolako ikasleekin batera osatua, entzulez bete zen antzokia, gehienak haurrek gurasoak eta aitona-amonak.

Haur abesbatza, kantuan, igandean./Amaia Larrañaga

Haur abesbatza, kantuan, igandean./Amaia Larrañaga

Azaroan sortu zuten haur abesbatza, hamabi lagunekin. Hamabi kantari horiekin segitzen du, zazpi neskato eta bost mutiko. Miren Gurutze Plazaola oñatiarra dute zuzendari, eta ostiralero bi orduko entseguak egiten dituzte. Ekainerako musikal bat prestatzen ari dira.

Informazio gehiago, Balentzategi herri eskolaren blogean.

Txindata musika eskolakoen emanaldiko irudi batzuk:

Txindatakoak./Amaia Larrañaga

Txindatakoak./Amaia Larrañaga

Txindatakoak./Amaia Larrañaga

Txindatakoak./Amaia Larrañaga

Txindatakoak./Amaia Larrañaga

Txindatakoak./Amaia Larrañaga

 


Herriko haur musikariek eta kantariek saio bateratua egingo dute, igandean, apirilak 28. Udaberri Kulturala egitarauaren barruko zazpigarren ekitaldian, Txindata musika eskolako ikasleek eta herriko haur abesbatzak kontzertua egingo  dute. Igandean, eliza ondoko antzokian, 17:00etan hasiko da (nahiz eta programan 18:00etan jartzen duen, ordubete aurreratu dute).

Haur koruak lehenbiziko emanaldia egin du jende aurrean. Azaroan sortu zuten, sei urtetik 12ra bitarteko hamabi partaiderekin. Miren Gurutze Plazaola oñatiarra dute zuzendari, zuzentzen dituen hainbat koruren artean (Noticias de Gipuzkoan Plazaolari elkarrizketa, martxoaren 23an).


Dhuna talde goierritarrak ostiralean herrian eman zuen kontzertuaren pasarte bat da hau. Goierri Telebistak grabatu zuen. Nerea Iztueta gabiriarra, Ane Arrieta segurarra eta Irati Badiola zegamarra, kantuan. Harrera ona izan zuen entzuleen partetik. Ordubete pasatxoko saioa osatu zuten hiru goierritarrek, jendearen gozamenerako.

Dhunako kideak ere pozik geratu dira, bai ostiraleko Gabiriako kontzertuarekin, bai biharamunean Idiazabalen egin zutenarekin. Honakoa idatzi zuten Facebooken, igandean: “Asteburu bikaina izan da! Eskerrik asko bai gabiriarrei bai izaldarrei guztiagatik! Primerako harrera egin diguzue, eta gozatu egin dugu bi kontzertuetan! milesker gonbidatzeagatik, eta eskerrik asko gerturatutako guztioi!”.


Goierriko hiru neskak —tartean gabiriar bat— osatutako Dhuna musika taldeak kontzertua egingo du, gaur gauean, Gabirian. Eliza ondoko antzokian da, 22:00etan. Udaberri Kulturala egitarauko ekitaldia da.

Nerea Iztueta gabiriarrak abesten du, taldean. Ane Arrieta segurarra eta Irati Badiola zegamarra dira beste bi musikariak. Beraiek sortutako abestiak kantatzen eta jotzen dituzte, tresna batzuk lagun. Badiolak konposatu ditu. Kontzertuan hamar-bat pieza entzun ahalko dira.

Musika “lasaia eta goxoa” egiten dute. Otsailaren 2an jo zuten lehen kontzertua, Urretxuko KKinZona irratian. Jendaurreko lehenbiziko ekinaldia Seguran izan zuten, martxoaren 8an, Botikaxar kultur gunean. Biharamunean, martxoak 9, Urretxu-Zumarragako Gaztelekuan jo zuten.

Gabiriakoa jendaurreko hirugarren kontzertua da. Bihar, larunbata, Idiazabalen joko dute, 19:30ean, Gaztelekuan. Gozatzeko kontzertua, galdu ezinekoa!

Hau KKinZona irratian jo zuteneko bideoa da:

 


Herriko jubilatuei udalak eskaintzen dien festa-eguna etzi izango da, igandean. Ohiko egitaraua du ospakizunak: 12:00etan meza, 14:00etan bazkaria (aurten Korta jatetxean), eta bi laguni omenaldia.

Meza ondoren, ordea, berritasun bat izango da: Lazkaoko Kantaka abesbatzak kontzertua egingo du, elizan bertan. Joseba Murua gabiriarrak kantatzen du koru horretan, baita zenbait ormaiztegiarrek ere. Debora Herrero Herrerok zuzentzen du.

Lazkaoko Kantaka abesbatza, 2001ean sortua./Kantaka

Lazkaoko Kantaka abesbatza, 2001ean sortua./Kantaka


Joxe Benantzi Bilbao organo-jotzaile mundakarrak kontzertua egingo du, igandean, Andre Mari elizan. Eguerdiko 12:00etako mezan zehar joko du lehenik, eta meza ostean errepertorio zabala aireratuko du 1804ko organo barrokotik. Duela lau urte ere jo zuen Bilbaok organo berean, beste kontzertu batean. Aurkezpenak, bai musikariarenak, bai organoarenak, Esteban Elizondo organista donostiarrak egingo ditu. Aldare aldean pantaila jarriko dute, koruko organo-jotzailearen lana zuzenean ikusteko. Gabiriako Parrokiak antolatu du kontzertua, udalaren, aldundiaren eta Gipuzkoako Organoaren Lagunak elkartearen laguntzarekin.


Udazkenero ohiko bihurtu den musika kontzertua igandean, azaroak 13, izango da Gabiriako Andre Mari elizan. Organo kontzertua antolatu du Parrokiak, Gipuzkoako Foru Aldundiaren eta Gipuzkoako Organoaren Lagunak elkartearen laguntzarekin. Andrea Toschi italiarrak joko du elizako koruko organo barrokoan, 1804ko tresna baliotsuan.

Igandean, 12:45 aldera hasiko da Toschiren musika emankizuna, eguerdiko meza bukatu eta jarraian. Esteban Elizondo organo jotzaile eta maisu donostiarrak aurkeztuko du emankizuna, eta errepertorioaren argibideak emango ditu, antolatzaileek iragarri dutenez.

Andrea Toschi Bologna hirian (Italia) jaioa da. G.B Martini Kontserbatorioan organoko diploma lortu zuen, 1982an. Bien bitartean, urte berean Bolognako Unibetsitatean Nekazaritza Zientzietan lizentziatu zen. Gaur egun Piazenzako Giuseppe Nicolini kontserbatorioan irakasle da. 1983tik organoko eta konposizio organistikoko maisu da Italiako hainbat kontserbatoriotan.

Andrea Toschi organo jotzaile italiarra.

Jotzaile modura, Europan eta Latinoamerikan kontzertuak eman ohi ditu, bakarlari modura, duoan (organoa haize tresnekin uztartua) edo orkestrekin. Errusiako eta Italiako irrati publikoetan ere jo izan du. 2004an ‘Organ music of today’ diskoa argitaratu zuen, musika garaikidearekin; 2005ean ‘Giulio Cesare Arresti (1619-1701) – Suonate da Organo di varii Autori’ diskoa atera zuen, Modenako San Agostino elizako 1519ko organo historikoan,


Anabel Aldalur mezzosoprano gabiriarrak kantaldia egin zuen aurreko larunbatean, urriak 15, Azkoitian (Gipuzkoa). Organo Erromantikoaren XII. Nazioarteko Zikloan parte hartu du kantariak, eta egitarauko bost kontzertutatik laugarrena berak eman zuen, Andre Mari elizan, larunbat arratsaldean. Alize Mendizabal piano-jotzaile donostiarra izan zuen lagun, pianoarekin. Haendel, Franck, Bassani eta Bach konposatzaileen obrak interpretatu zituzten.


Hamahiru abeslarik osatutako Euskal Herriko Kea ahots ‘ensemble’ koru taldeak kontzertua egingo du etzi, asteartea, Gabirian. Andre Mari Jasokundearen elizan egingo dute kantaldia, 20:00etatik aurrera. Sarrera irekia eta doanekoa da entzutera joan nahi duten guztientzat. Kea ahots taldea Argentina hegoaldera joango da abuztuaren hasieran, eta, hain zuzen, Gabiriako kontzertua izango da irten aurretik emango duten azkena.

Kea ahots taldeko hamahiru kideak, tartean Xabier Barriola herrikidea. Arg.: Kea

Xabier Barriola herrikidea da koruaren kideetako bat. 1997an sortu zuten Kea taldea, “ahots ensemble” korua. Abesbatzen errepertorio garaikidea jorratzen du. Musikagile gazteen lanak zabaltzea du helburuetako bat, baita azkeneko mendeko koru-musika hedatzea ere. Hamalau urteko ibibildean emaitza oparoak eta nazioarteko esperientzia jasoa lortu du Keak. Espainian jaialdi garrantzitsuenetan aritu izan da, Cagliarin, Porto-Torresen (Sardinia), Châteaurouxen eta Normandian (Frantzia), Maasmechelen (Belgika)… parte hartua da, askotan sariak jasoa ere bai.

Diskografia alorrean ere jardun du, eta hainbat CD ditu argitaratuta. Bacri, Daniel-Lesur, Jennefelt, Castán, Azurza, Bello-Portu, Luis de Pablo eta Sandström musikagileen lanak bildu dituzte diskoetan.

Gabiriako kontzertuaren ondoren Argentinan Koru Musikako 9. Simposiumean parte hartuko du Keak, Puerto Madryn-en. Koru Musikarako Nazioarteko Federazioak antolatzen du bilkura hori, eta munduko 25 koru aukeratuetako bat da Kea simposiumean abesteko.

Enrique Azurza du gaur egun zuzendari. Haren gidaritzapean, honako abeslariek kantatuko dute etzi Gabiriako elizan: Miren Garikano, Ana Otxoa eta Maria Jesus Ugalde (sopranoak); David Azurza (kontratenorea); Isabel Lakar eta Arantxa Irazusta (kontraltoak); Javier Alberdi, Aitor Ezeiza eta Xabier Barriola (tenoreak); Josu Lopez Soraluze eta Jorge Apodaka (baritonoak); Xabier Sarasola eta Pablo Azpeitia (baxuak).

Aukeratu duten errepertorioa, hauxe:

  • ‘Ave Maris Stella’, Javier Busto (1949an jaioa).
  • ‘Trahe me post te’, Alfredo Aracil (1954).
  • ‘Amica mea’, Marcos Castán (1972).
  • ‘P.A.X.’, Aurelio Edler (1976).
  • ‘Three choral graffiti (2011)’: 1. ‘Doctor, I hear voices’; 2. ‘Upstairs, oh! Downstairs’; 3. ‘Spray Christus’.
  • ‘Cantos del Agua’, Dante Andreo (1949).
  • ‘Llanto por Martín Zalacaín’, Javier Bello-Portu (1920-2004): Tres canciones sentimentales: ‘Ostiraletan duzu’, ‘Berceuse de Reparacea’, ‘Plainte de la jeune cháteleine’. Tres canciones alegres: ‘Donostiaco damachoac’, ‘Buba ñiñaño’, ‘Lastozko zubiya’.

 


Larunbatean, maiatzak 28, Txindata musika eskolako ikasle gabiriarrek musika emanaldia egingo dute. Eliza ondoko antzokian 17:30ean hasiko da saioa. Gabiria Kultura egitarauaren barruko ekitaldia da, berez aurreko iganderako iragarrita zegoena baina hauteskunde igandea izateagatik atzeratua.


Irakurle batek jakinarazi duen bezala, Txindata musika eskolak igande honetan,  hilak 22, egitekoa zuen emanaldia ez da asteburu honetan egingo, hurrengoan baizik. Igandea hauteskunde eguna delako hurrengo larunbatera atzeratu dute. Beraz,  maiatzaren 28an egingo dute kontzertua Txindata eskolan musika ikasten ari diren haur gabiriarrek. Ordua eta lekua aldatu ez badute, behintzat, eliza ondoko antzokian izango da, 17:30ean.