Archive for the ‘Ikastaroak’ Category


Judoko hastapeneko ikastaroa ematen hasiko dira gaur, herrian. 13 urtetik gorakoentzat da. Uztailean zehar izango da ikastaro berezia, hilaren 19ra arte. Dantzalekuan jardungo dira, astelehenetan eta asteazkenetan 18:30etik 19:30era. Bukatu berri den lanurtean hasi zen judo eskaintza, estreinakoz. Ekainaren 26an bukatu zen. Hurrengo ikasturtean ere (2013-14) judo ikastaroak jarraituko du. Bai udako ikastaroan, bai urtean zeharrekoan izena emateko, Judo Legazpi taldekoekin jarri behar da harremanetan.


Aurreko ostiralean, ekainak 21, bukatu zen euskara ikasteko herrian antolatutako azken urteotako bigarren ikastaroa, udalak sustatutakoa. Ikasturte osokoa izan da aurten, lehen aldiz, urrian hasita. Aurreko kurtsoan, 2012. urtearen hasieratik ekainera izan zen, lau hilabete.

Sei ikasle aritu dira euskaran sakontzen, Nerea Iztueta irakaslearekin. Asteazkenetan eta ostiraletan ordu eta erdiko saioak egin dituzte.


Etxean autokonposta egiteko ikastaroak emango ditu Sasieta Mankomunitateak aste honetan Gabirian. Asteartean (ekainak 18) eta ostegunean (ekainak 20) 19:00etan da, Etxeberri kultur etxean. Ontziak jasotzeko modua ere orduan izango dute herritarrek.

Udalak eta Sasietak etxe guztietan konposta egin dezaten lortzea nahi dute. Izena emateko epe bat ireki zuten maiatzean, eta orduan 60 bat etxe apuntatu ziren. Izena eman ez zutenei zuzenean telefonoz hots egin die udalak, asmoa azalduz eta zer egin behar duten esplikatuz. “Gehien-gehienek baiezkoa eman dute, jarrera ona agertu dute”, esan du Jokin Murua zinegotziak.Ikastaroan, konposta nola egin behar den azaldu, eta ontziak nola muntatu eta nola funtzionatzen duten azalduko dute. Sasietako teknikari batek emango du.

Herrian hondakinen funtzionamendu berria abiaraziko dute aurki udalak eta Sasietak. Berez, kurtsoa emandakoan hasteko moduan izango da jendea. Konposta etxean egingo dute, eta gainerako hondakinak uzteko hiru (edo lau) gune egongo dira udalerrian barrena: kaskoan (eskonbrera edo hondakindegi zaharrean, gau egun dagoen leku berean); Zuazolan eta Itzaitegi-Astiazaran bitartean. Laugarren bat Aztirian jarriko lukete, oraindik zehatz ez baldin badakite ere. Bestetik, Alegia, Orbeldi eta Santa Luzia ibarreko gabiriarrek Santa Luzia-Anduaga auzora joan beharko dute hondakinak botatzera, Ezkio-Itsaso Udalak han egokituko duen gunera.

Edukiontzi guztiak egongo dira gune horietan, birzikla ezin litezkeen hondakinena barne. Giltzarekin jarri ala ez, oraindik erabakitzeko daukate. Aurrerantzean, udalerri bakoitzak sortzen duen hondakin kopuruaren arabera ordaindu beharko du bilketa eta tratamendu zerbitzua.


Balentzategi herri eskolan gurasoei eta irakasleei zuzenduta egitekoa ziren sare sozialen inguruko ikastaroa (bihar zen egitekoa, 17:30etik 19:00etara, eskolan) atzeratu egin da. Irakasleak ezin duela, eta hurrengo astelehenean (maiatzak 20, 17:30ean, eskolan) emango dute kurtsoko bi jardunaldietatik lehenengoa.Bigarren klasea hasieran maiatzaren 20an ziren egitekoak, baina hori ere atzeratu egin beharko dute, noiz arte zehaztu ez badute ere.

Hiru helburu ditu Interneteko sare sozialei buruzko ikastaroak: “gurasoei eta irakasleei gai honen inguruan erabiltzen den hiztegia eta kontzeptuak ulertzen laguntzea, modu praktikoan”, “abantailak eta desabantailak aztertzea, modu egokiak eta desegokiak zeintzuk diren jakiteko”, eta “seme-alabekin edo ikasleekin gaia nola landu aztertzea”. Beasaingo La Salle ikastetxeko Lehen Hezkuntzako koordinatzaile eta irakasle Mikel Garciak emango du.


KZgunea Interneten erabilpen eta hedapen sare publikoak ikastaro sorta zabala jarri du, Gabirian egin daitezkeenak. Prestakuntza ikastaroak dira, gai ugariri buruzkoak. Udalak maiatzaren hasieran bidalitako bandoarekin batera igorri zuen programazioa. Interesatuek datorren asteazkena (maiatzak 15) baino lehen apuntatu behar dute, orria bete eta udaletxera eramanda. Doan dira.

Bandoa. Informatika ikastaro eskaintza (PDF, 2-3 orrialdeak)


Erbie elkarteak antolatutako fruta-arbolak kimatzeko ikastaroaren bigarren zatia, saio praktikoa, gaur eta bihar ziren egitekoak, Josu Osa adituarekin. Baina larunbatetik elurra ari duenez, atzeratu beharrean suertatu dira. Martxoaren 12an eta 13an egingo dute, partaideak bi multzotan bereizita. 16:00etan hasiko da.

Hiru egunotan elurra mardul egin du. Sagastiak ere estali dituenez, inausketan aritzea ezinezkoa da. Bestetik, ikastaroa egin behar duten sagastirako bidea luizi batek eraman zuen otsailaren 14an. Edersal fabrikarako bidea, eta beheraxeago dagoen Idarraga alderakoa suntsitu zituen.

Komenturako eta Idarraga baserrietarako bideak, luiziak hondatuta. Pasabidea atondu dute atzera./AMM

Komenturako eta Idarraga baserrietarako bideak, luiziak hondatuta. Pasabidea atondu dute atzera./AMM


Sagarrondoak eta fruta-arbolak inausteko eta txertatzeko ikastaroak otsailaren 25ean eta 26an, datorren astelehen-astearteetan izango du jarraipena. Talde jendetsua —azalpen teorikoen ikastaroan 50 lagunetik gora bildu ziren— bitan banatu, eta bi egun hartuko dituzte inausketaren irakaspenak zuhaitzetan bertan egiten ikasteko. Josu Osa aditua ari da ikastaroa ematen, Erbie elkarteak antolatuta eta Goimen agentziak lagunduta. Gabino Muruaren sagasti batean egingo dituzte praktikak, eguraldiak laguntzeko baldin badu behintzat.


Sagarrondoak eta fruta-arbolak inausteko eta txertatzeko ikastaroa eman du gaur arratsaldean Josu Osak, Erbie elkartean. Berrogeita hamar lagun baino gehiago bildu dira, antolatzaileek Twitterren esan dutenez. Erbie elkarteak antolatu du saio hori, Goimen agentziaren laguntzarekin. Bi zati ditu: bat, gaur egin duten teorikoa. Bestea, praktikoa, herriko sagasti batean egingo dute.

Josu Osa eta Gabino Murua, gaur arratsaldeko ikastaroan. /Erbie Elkartea-Errezilsagarra

Josu Osa eta Gabino Murua, gaur arratsaldeko ikastaroan. /Erbie Elkartea-Errezilsagarra


Beraien artean oso bestelako jakintza-gaiak ezagutzeko eta ikasteko modua izango da herrian, aste honetan zehar. Batetik, udalaren Euskara eta Kultura Batzordeak ideiatutako ‘hartu-eman ikastaroak’ hasiko dira. Estreinaldia hitano ikastaroak emango dio, asteazkenean (otsailak 13, 19:00etan kultur etxean). Marian Bidegain euskara irakasleak hikako formak zuzen eta egoki nola erabili behar diren azalduko du. Beste hiru saio izango ditu ikastaro horrek, jarraiko hurrengo asteazkenetan: otsailak 20, 27 eta martxoak 6. Ordubete iraungo du bakoitzak.

Bestetik, eta hartu-eman  saioen barruan, xaboi kozkorrak etxean nola egin daitezkeen erakutsiko du Pake Galdosek. Larunbatean 16:00etan da, Osinalde elkartean.

Eskaintza borobiltzeko, Josu Osak fruta-arbolak inausten eta kimatzen erakutsiko du, ostegunean, 16:00etatik 20:00etara. Erbie elkarteak eta Goimen agentziak antolatu dute ikastaroa, bi egunekoa; ostegunean teorikoa, eta beste egun batean (ostegunean zehaztuko dute), praktikoa, sagasti batean. “Oraintxe  da garaia, neguan, gure sagarrondoak lo daudenean behar bezalako kimatze eta inausketa lanak egiteko”, diote antolatzaileek. Egitasmoak egundoko oihartzuna izan du, eta berrogei bat lagunek emandute izena.

Josu Osa, azaroko Errezil Sagar Egunean, txertaketak nola egin erakusten./AMM

Josu Osa, azaroko Errezil Sagar Egunean, txertaketak nola egin erakusten./AMM


Inausketa edo podaketa ikastaroa antolatu du Erbie elkarteak, Gabiriako Udalaren eta Goimen agentziaren laguntzarekin. Ikastaroa bi arratsaldetan egingo da, eta Josu Osak emango du. Azaroko errezil sagar egunean erakustaldia egin eta azalpenak eman zituen aditu horrek.

Lehenengo saioa teorikoa da, eta otsailaren 14an (osteguna) egingo da, 16:00etatik 19:00etara, kultur etxean. Bigarrena praktikoa izango da, eta noiz egin egun horretan zehaztuko dute. Izena emateko udaletxera hots egin behar da (943 88 07 34) otsailaren 12a baino lehen. Prezioa, bakoitzarena 5 euro da.


Mintzalaguna egitasmoa jarri nahi du udalak herrian. Euskara ikasten ari direnentzat lagungarri izatea da asmoa, hizketako soltura har dezaten, beti ere euskaldun zahar baten konpainian. “Denbora pixka bat badaramagu euskara klaseak antolatzen Gabirian. Bertako ikasleei laguntza moduan, mintzalagun talde bat osatzea pentsatu dugu”, dio udalak urtarrilaren azken egunean banatutako bandoan. Astean ordubetez euskaldun zaharra eta euskara ikasten ari dena elkartuko lirateke, hitz egiteko. Eskaintza hori ez da soilik Gabirian ikasle direnentzat, edonork parte har dezake. Parte hartzeko edo laguntzeko interesa dutenek udaletxean eman behar dute izena, martxoaren 1a baino lehen.


Udalak hartu-eman ikastaroak antolatu nahi dituela jakinarazi du, herritarrentzat eta doan, aurreko ostegunean datatutako bandoaren bidez. Zerbaitetan aritua edo aditua den herritarrak emango lituzke kurtso motzak, herrikideentzat. “Guztiok parte har dezakegu, guztiok baitugu besteei erakusteko zerbait”, dio udalak. Ikastaroren bat eman nahi duenak udaletxera hots egin behar du.

Deialdia egitearekin batera, dagoeneko bi ikastaro antolatuta daudela jakinarazi du. Hitano ikastaroa (hika hizketa-moldea lantzeko) Marian Bidegainek emango du, otsailaren 13, 20, 27 eta martxoaren 6an, Etxeberri kultur etxean. Bestea, xaboi koskorrak egiteko ikastaroa da, Pake Galdosek emango du, otsailaren 16an 16:00etan, Osinalde elkartean; iraupena ordubete ingurukoa izango du. Bi kurtso horietan parte hartzeko, jarritako orduan tokira bertara agertu besterik ez dago.


Herrian yoga egiteko aukera dago, duela urte batzuetatik. Orain, urtearen hasieran, jende gehiagorentzat lekua badagoela, eta izena emateko aukera eman dute arduradunek. Osoko yoga (integrala) egiten dute, astean bi saiotan: astearteetan eta ostegunetan, 19:00etatik 20:30era. Interesatuek Marian irakaslearekin hitz egin behar dute (617 520 402).


Guraso Elkarteak antolatutako patinatze ikastaroan hasi nahi dutenek gaur, ostirala, dute apuntatzeko azkeneko eguna. Ikastaroa otsailaren 2an hasiko da, eta hamabi larunbatetan jarraituko du, aldiko ordubete (helduek 16:00etatik 17:00etara, haurrek 17:00etatik 18:00etara). Matrikula 75 eurokoa da, eta irristailuak, kaskoa eta babesgarriak norberak bereak eraman behar ditu.


Patinaje edo irristaketa ikastaroa antolatu du, bigarren aldiz, Balentzategi eskolako Guraso Elkarteak. Izena emateko epea ostiralera arte (urtarrilak 25) dago zabalik. Izena Balentzategi eskolan, Etxeberri kultur etxean eta Ostatuan jarri dituzten orrietan idatzi behar da. Ikastaroaren kostua 75 eurokoa izango da ikasleko. Irristailuak, kaskoa eta babesgarriak norberak eraman behar ditu. “Jende gehiegi apuntatuko balitz, gabiriarrek izango lukete lehentasuna”, diote antolatzaileek.

Otsailaren 2an hasiko da, eta denera hamabi saio izango dira, larunbatetan. Bi klase izango dira: helduen taldea 16:00etatik 17:00etara ariko da, eta haurrena 17:00etatik 18:00etara. Umeentzat gutxieneko adina bost urte da. Sandra Fernandez izango da erakuslea. Iaz izan zen estreinako aldiz, eta “izan zuen arrakasta” ikusita, aurten ere egitea erabaki dute.