Archive for the ‘Hitzaldiak’ Category


Eusko Jaurlaritzaren Herrizaingo Saileko Larrialdien eta Meteorologia Zuzendaritzak bilera informatiboa egingo du, gaur osteguna, Gabiriako eta Ormaiztegiko bizilagunei zuzenduta (Ormaiztegiko kultur etxean, 18:30ean). Arrisku kimikoa duten enpresen inguruetan bizi diren bizilagunentzat babesa “indartu” nahi du jaurlaritzak. Kasu honetan, Troia meategietako hondakin urtegia da Gabirian arrisku kimikoa eta isuri kutsagarriak eragin ditzakeen elementua, Exminesa enpresak eraikitakoa Gesaleko sakonean.

Berriki Kanpoko Larrialdi Plana onartu eta homologatu dute Troiko hondakindegian. Arrisku kimikoa duten enpresa horietan, istripu kasuetan bizilagunek hartu beharreko segurtasun neurriak eta zer jokabide izan behar duten informazioa ematea da kanpainaren helburua. EAEko 11 enpresaren eremuei eragingo die: Bizkaian 9, Araban 1 eta Gipuzkoan 1, Troikoa. Informazio kanpainan, lehenbizi denera 38.000 gutun bidaliko dizkie jaurlaritzak bizilagunei, eta ondoren bilerak antolatuko dira herrietan. Gabiriako eta Ormaiztegiko bizilagunena gaur egingo da, kanpainaren azken egunean.


Asteburu miragarria izan da herritar askorentzat. Eskola-etxearen mendeurrenaren aitzakiarekin, haur garaietara itzultzeko modua eman dute egitarauan zeuden ekitaldiek. Lehengo jolasen errepasoa ostiralean, solasaldi jendetsua eta animatua larunbatean, ekitaldia igandean, eta asteburu osoan argazki zein materialen erakusketa estimatua.
Pupitre zaharrak, liburu erabiliak, koaderno gastatuak, argazki horituak… Oroitzapenen kutxa irekitzeko giltza, guztiak ere. Aste osoan egongo da, larunbatera arte, erakusketa ikusteko aukera, 16:00etatik 18:00etara.
Hona hemen asteburuaren errepasotxo bat, argazkitan.

This slideshow requires JavaScript.


Domund egunaren bueltan, Gabiriako Andre Mari Jasokundearen elizako batzordeak misioetara bidaltzeko laguntza biltzeko deia egin die herritarrei, eta ekarpenak jasotzeko bi bide ipini ditu. Batetik, ohiko modua, elizan diru laguntza ematea. Bestetik, Kristina Etxezarreta mojaren bitartez bideratuko dute gabiriarren laguntza, Kamerunera. Etxezarretak Kamerunen lan egiten du, misiolari. Bi ikastetxe dituzte.

Etxezarretak urriaren 15ean egin zuen hitzaldia, Etxeberri kutur etxean. Katekesi taldeak antolatu zuen ekitaldia, “hemengo haurrek munduko beste egoera batzuen berri jakin dezaten”. Moja azpeitiarrak argazkiekin hornitu zuen hitzaldia, haur kamerundarren bizimodua, beharrak eta egoera azaltzeko.

Hitzaldiak “arrakasta handia” izan zuen, “ume, guraso nahiz beste herritar batzuen parte-hartzearekin”, Eliza Batzordeko kideek jakinarazi dutenez.

Gabiriarrak, Kamerungo haurren argazkiak ikusten, Kristina Etxezarretak egin zuen hitzaldian.


Iñaki Murua bertsolari eta Euskal Herriko Bertsozale Elkartearen lehendakari gabiriarrak hitzaldia egingo du, astelehenean, Lazkaon. Maizpide euskaltegiak antolatutako kultura jardueran, urriaren 17an, “bertsoa zer da?” gaia oinarri hartuta azalpenak emango ditu. Euskaltegiko zinema-aretoan izango da hitzaldia, 21:00etan hasita.


Kristina Etxezarreta azpeitiarrak —senitartekoak ditu Gabirian— hitzaldia egingo du larunbatean, urriak 15, Gabiriako Etxeberri kultur etxean. Lekaime lanetan Kamerunen ari da gaur egun, eta hango gizartearen nahiz herritarren egoera eta bizipenak kontatu ditu. Hitzaldia larunbatean 17:00etan hasiko da.

Hango argazkien bidez hornituko du Etxezarretak kontakizuna. Kamerunen bi eskola zabaldu dituzte, eta bera da zuzendaria. Afrikako haurrekin lan egiten duenez, haiek nola bizi diren azaldu du.

Hitzaldiaren ondoren, larunbatean 19:00etan, umeen meza egingo da, Andre Mari elizan.


Hiribururaino iritsi zen atzo Gabiriaren aipamena. Edo irudia. Donostian egin zuten sagarrari buruzko jardunaldi batean hartutako irudia da behekoa, Gotzon Aranburu kazetariak bidali diguna. Iñaki Larrañagak, Diputazioko Garapen Pomologikoko teknikariak, hitzaldia egin zuen, Ezkio-Itsasoko Igartubeiti baserri-museoak antolatu duen X. Sagardo Astearen barruan. San Telmo museoan izan zen jardunaldia, eta iruditan, ikus daitekeenez, Gabiriako errezil sagarrak ere izan zituzten hizpide.

 

Iñaki Larrañaga hitzaldia egiten, atzo, San Telmo museoan, Donostian. Pantailan, Gabiriako errezil sagarrak. Arg.: Gotzon Aranburu


Lazkaoko Maizpide euskaltegiak astero antolatzen ditu kultur ekitaldiak, bertako ikasleentzat eta egoiliarrentzat pentsatuak baina herritar guztiei irekiak. Aste honetako saiorako gabiriar bat gonbidatu dute, Leire Murua. Azken urte honetan Dominikar Errepublikan egin duen egonaldiaz eta hango esperientziaz hitzaldia egingo du, bihar, asteazkena, 21:00etan, Maizpiden.

Gabiria Kultura egitarauaren barruan ere egin zuen gai berari buruz hitzaldia, maiatzaren 12an.


Gabiria Kultura izenpeko kultura egitarauak bihar, osteguna, du hurrengo hitzordua. Leire Murua gabiriarrak Dominikar Errepublikako egonaldian ikusitakoak eta ikasitakoak kontatuko ditu. Etxeberri kultur etxean da hitzaldia, bihar 19:00etan. Dominikar Errepublikak Haitirekin batera Karibe itsasoko irla bat hartzen du. Iaz Haitin izan zen hondamendiak giza uholdea mugiarazi zuen Dominikar Errepublikarantz. Izango du zer kontatua Muruak.

Bestetik, programazioko bigarren ekitaldia, aste honi dagokiona, larunbatean da: antzerkia. Balentzategi eskolako haurrek, aspaldiko tradizioari eutsiz, antzezlana egingo dute herrikideen aurrean. Zapatuan 17:00etan hasiko da ikuskizuna, eliza ondoko antzokian. Antzerkiaz gain bertsoak eta kantuak ere prestatu dituzte aurtengo saiorako.


Larunbatean, etzi, goiz osoko jardunaldia egingo dute Larraulen (Gipuzkoa), Gipuzkoako Eskola Txikien Koordinakundeak antolatuta. Gipuzkoa osoko Eskola Txikietako gurasoentzat prestatutako egitaraua da, eta tartean Gabiriako Balentzategiko haurren aita-amak ere izango dira.

Larunbatean 09:30ean hasiko da goiz beteko egitaraua, harrera eginda. Ordubeteko bi tailer egingo dituzte lehenengo, parte-hartzaileak bi multzotan erbibanatuta. Mare Goikoetxeak (Gabiriako eskolan sei urte darama ingelesa irakasten) eta Juan Carlos Alonsok tailer bana gidatuko dute, gai hauekin hurrenez hurren:  Ingelesa eskola txikietan eta adin desberdinetako haurrak gela berean egoteak dakartzan onurak; eta errespetu faltaren atzean zer dagoen.

Azken partean Elena Laizek hitzaldia egingo du, Eskola Txikietako ardatz metodologikoak esplikatzeko. Larraulgo eskolan izango da topaketa, eta haurrak zaintzeko zerbitzua egongo da.

 


Aurreko ostiral arratsean Osinalde elkartean aurkeztu zuten Lehengo Aztiri liburua Jose Luis Ugarte eta Aitor Azpiazu egileek. Xehetasun eta jakingarri berri ugari eman zituen Ugartek bere hitzaldian, hogeita hamar-bat entzuleren aurrean. Burdinola elkartearen lehendakari ere baden ikertzaile legazpiarrak azaldu zuenez azken aldian “asko” jo dute Gabiriara, “batez ere Aztiria aldera. Eta ustekabe handiak hartu ditugu, ustekabe atseginak. Gauza berezi asko ikusi ditugu Aztirian”, hasi zuen bere hitzaldia.

'Lehengo Aztiri' liburuaren aurkezpena ostiral arratsean Osinalde elkartean. Mahaian, Aitor Azpiazu eta Jose Luis Ugarte. Arg.: Aimar Maiz

Antzinako burdingintzari buruzko erreferentzia interesgarriak eman zituen. “Betidanik Legazpi, Mutiloa eta Zerain lotu izan dira burdingintzarekin, baina guk ikusi dugunez Gabiria ere sartu beharra dago, merezimendu osoz. Antzinako zepadi eta karobi zaharrez beteta daude Aztiri aldeko mendiak”, azaldu zuen Ugartek.

(gehiago…)


Emakume Baserritarren Elkarteko (Ebel) lehendakari izana den Amelia Jauregi gabiriarrak emakumearen inguruko jardunaldi batean parte hartu zuen herenegun Zaldibian, Goizane eraikinean. Ebel elkarteak antolatuta, Euskal Herriko eta Peruko emakumeen arteko topaketa egin zuten bideokonferentzia bidez.

Amelia Jauregi gabiriarra, astelehenean Zaldibiako Goizanen hitzaldia egiten, pantailan Los Olivos-Limako (Peru) emakumeak dituela. Arg.: Goierriko Hitza

Hizlarietako bat Amelia Jauregi izan zen. Ebel-en sorrera gogoratu zuen, 1991. urtean EHNE sindikatuaren barruan urratsa nola egin zuten esanez. Emakumeak elkartzeko eta zituzten gabezien aldarrikapena egiteko helburua izan du hogei urteotan Ebel-ek. Gaur egun nekazaritzako gizarte segurantza, baserrietan bizi diren eta emakumeen ardurapean dauden adinekoen nahiz mendekoen zaintza, edo Eusko Jaurlaritzaren agendan dagoen emakume baserritarrarentzako estatutua lantzea eta indarrean jartzea dira egiteko nagusiak.

Goierritarrek eta peruarrek hainbat gai jorratu zituzten. Mesa de Trabajo de la Mujer Olivense elkargoarekin trukatu zituzten esperientziak eta harremanak. Liman emakumearen alde eta berdintasuna lortzeko diharduten hainbat elkarte batasun horretan bilduta daude. Ebel-ek Euskal Herrian halako lan mahaia sortu du, eta herenegun Zaldibiakoa izan zen aurreneko juntadizoa.


Koke Lasa mendizale ormaiztegiarra Balentzategi herri eskolako haurrekin hizketaldian aritu zen herenegun, otsailak 2, asteazkena. Bere mendiko abenturen eta espedizioen berri eman zien eskola-umeei. Himalayan igoera ugari ditu eginak Lasak, tartean zortzimilako sei mendi. Azkeneko espedizio “handia” Kangchenjungara egin zuen, 2009an, osasun arazoak tarteko gorabeheratsua suertatu zena. Gabiriako eskolan gabiriar pertsonaiekin antolatu ohi dituzte noizean behin solasaldiak.