Archive for the ‘Azpiegiturak’ Category


Deikaztelu eta Itsaso arteko 400.000 volteko zirkuitu bikoitzeko argindar linearen proiektua bertan behera uzteko eskatu zion Gipuzkoako Foru Aldundiak, atzo, Espainiako Gobernuari. “Makroproiektu” horrek “gabezia eta hutsune nabarmenak” dituela ohartarazi du Foru Aldundiak: “Sustatzaileek ez dute haren beharra justifikatu; ingurumen azterketa ez da behar bezala egin, nahiz eta ingurumenean eta babestutako eremuetan eta espezien artean izugarrizko eragina izango lukeen; herritarren artean kontrako jarrera garbia eragin du, eta araudia bera ere ez luke beteko”. Beraz, baimenik ez emateko eta bertan behera uzteko eskatu du Iñaki Errazkin Ingurumeneko eta Lurralde Antolaketako diputatuak.

Baimena emanez gero, araudia ez litzatekeela beteko gogorarazi dio, gainera, Espainiako Gobernuari. Red Electrica Española enpresak sustatu nahi duen egitasmoa ez dago energia elektrikoaren gaur egungo garraio sarearen estatu plangintzan. 2014-2022 eperako beste plangintza bat prestatzen ari dira, baina indarrean dagoenean ez dago txertatuta linea berri hori. Bestetik, gaur egun linea berririk egiteko baimen gehiago ezin dela eman gogorarazi du Diputazioak, 13/2012 Errege Lege Dekretuak aipatuz. Energia elektrikoa garraiatzeko sarearen plangintza berririk onartu arte, ezingo da Estatuko Administrazio Orokorraren eskumenekoak diren garraio-instalazioetarako administrazio baimen gehiagorik eman. “Beraz, Deikaztelu eta Ezkio-Itsaso eta Castejon-Muruarte arteko lineen proiektua gaur egungo plangintzan ez dagoenez, eta ezin denez baimen gehiagorik eman, plangintza berririk sortu ezean, administrazio eskudunek bertan behera utzi beharko lukete proiektua. Bestela, ez litzateke araudia beteko”, adierazi du Foru Aldundiko Ingurumen eta Lurralde Antolaketako Departamentuak.

Gipuzkoako Foru Aldundiak hainbat helegite aurkeztu dizkio tentsio altuko linea proiektuaz egindako ingurumen txostenari. Nagusia, esandakoa. Horrez gain, proiektuari buruz aurkeztu den informazioa ez dela aski iritzi dio, “ezarri nahi diren instalazio horien benetako premia objektiboa justifikatzeko. Oinarrizko eta funtsezko gabezia horrek behartu beharko luke benetan eta seriotasunez hausnartzera proiektua aurrera eramatea komeni den ala ez. Are gehiago, Foru Aldundiak azaldu duenez, energia elektrikoaren eskari gordina nabarmen gutxitu da Estatu mailan azken sei urteetan, eta aurrerantzean ere joera bera izatea espero da. Horregatik, eskariaren jaitsierari buruzko datuek adierazten dute ez dagoela elektrizitatea sortzeko eta garraiatzeko instalazio berririk egin beharrik, eta jasangarritasunaren ikuspegitik egin beharko litzatekeena energia aurreztea eta eraginkortasuna bultzatzea dela”.

Ildo horretatik, proiektuan ez dago daturik linearen beharra justifikatuko luketen energia planta berriez, ezta Estatuko gaur egungo lineen balizko saturazioaz ere. Ingurumen eragina ere ez da behar bezala baloratu, Aldundiak dioenez. “Ez dezagun ahaztu, esaterako, tentsio altuko lineak Natura 2000 Sarean babestutako hainbat eremutan izango lukeela eragin zuzena, eta hainbat espezierentzat —hegaztiak, batik bat— kaltegarria izan daitekeela”. Proiektuak herritarren artean kezka eta aurkako jarrera eragin duela ere gogorarazi du Aldundiak.

Garoña-Itsaso linearen Ardantza gaineko dorrea. Linea honetatik garraiatuko lukete, azken kilometroetan, 400.000 volteko korrontea, Aranburu eta Katarain baserrien bitartean lotuta./AMM

Garoña-Itsaso linearen Ardantza gaineko dorrea. Linea honetatik garraiatuko lukete, azken kilometroetan, 400.000 volteko korrontea, Aranburu eta Katarain baserrien bitartean lotuta./AMM


Gabiriako Udalak 2013-2016 urteen arterako ekonomia eta finantza plana landu behar izan du, Espainiako Gobernuak berriki indarrean jarritako lege batek hala eskatuta. Inbertsioen atalean udalek gaur egun ezin dute aurreko ekitaldiko kopurua baino %1 baino gehiago bideratu, aurrekontuetan. Portzentaje hori gainditzen bada, Espainiako Gobernuak gainbegiratu beharra dauka udalaren ekonomia egoera. Horretarako,  hiru urteko plan ekonomiko-finantzarioa eskatzen diete udalei, alkateak azaldu duenez, gastua ordain dezakeela eta udalak solbentzia baduela frogatzeko.

2012ko udal aurrekontuetan inbertsioetarako ez zen diru sailik izendatu, 0 euro ziren. Aurten, berriz, kale argiteria sistema aldatzeko proiektua abiarazi du udalak, 81.184,51 euroko aurrekontuarekin (BEZa barne). Hala, legeak aurreikusitakoa baino inbertsio-gastu hazkunde handiagoa duenez, hiru urteko plana aurkeztu du udalak.

Udalbatzak ekainaren 17ko osoko bilkuran onartu zuen 2013-2016 epeko plan ekonomiko-finantzarioa. Espainiako Gobernuak ere oniritzia eman diola esan du alkateak, eta, beraz, aurtengorako aurreikusitako inbertsioa egin ahalko dela.

2013-2016 plan ekonomikoaren jendaurreko erakusketaren iragarkia GAO 2013-7-4


Gabiriako Udalak udalerriko argiteria publikoa aldatzeko lehiaketa atera du. Sistema hobetzeko eta energia kontsumoa murrizteko helburua izan behar du aldaketak. Hartarako, lehendik plazako farola batzuetan jarrita dauden “inteligentziazko sistema integrala” erabili beharko da herriko gainontzeko kale-argietan ere.

Energia aurrezteko sistema duen farola bat, Gabiriako plazan. Led motako lanpara eta hurreratze-sentsoreak ditu./AMM

Energia aurrezteko sistema duen farola bat, Gabiriako plazan. Led motako lanpara eta hurreratze-sentsoreak ditu./AMM

Hornitzeko eta instalatzeko deialdia gabiria.net webgune ofizialean egin zuen, ekainaren 20an, iragarkia eta baldintza pleguak argitaratuta. Lehiaketaren oinarrizko aurrekontua 67.094,64 euro gehi BEZa (14.089,87 euro) da, denera 81.184,51 euro. Eskaintza egiten dutenek kopuru hori beherantz hobetu ahalko dute.

Herriko plazan argiteria “adimenduna” probatzen 2010eko azaroan hasi zen Luix Iluminacion Inteligente enpresa. Euskal Herriko lehenengo esperimentua izan zen, teknologia hori kale-argietan aplikatu zuena. Ondoren, 2011ko azaroan aurkeztu zuten sistema.


Etxean autokonposta egiteko ikastaroak emango ditu Sasieta Mankomunitateak aste honetan Gabirian. Asteartean (ekainak 18) eta ostegunean (ekainak 20) 19:00etan da, Etxeberri kultur etxean. Ontziak jasotzeko modua ere orduan izango dute herritarrek.

Udalak eta Sasietak etxe guztietan konposta egin dezaten lortzea nahi dute. Izena emateko epe bat ireki zuten maiatzean, eta orduan 60 bat etxe apuntatu ziren. Izena eman ez zutenei zuzenean telefonoz hots egin die udalak, asmoa azalduz eta zer egin behar duten esplikatuz. “Gehien-gehienek baiezkoa eman dute, jarrera ona agertu dute”, esan du Jokin Murua zinegotziak.Ikastaroan, konposta nola egin behar den azaldu, eta ontziak nola muntatu eta nola funtzionatzen duten azalduko dute. Sasietako teknikari batek emango du.

Herrian hondakinen funtzionamendu berria abiaraziko dute aurki udalak eta Sasietak. Berez, kurtsoa emandakoan hasteko moduan izango da jendea. Konposta etxean egingo dute, eta gainerako hondakinak uzteko hiru (edo lau) gune egongo dira udalerrian barrena: kaskoan (eskonbrera edo hondakindegi zaharrean, gau egun dagoen leku berean); Zuazolan eta Itzaitegi-Astiazaran bitartean. Laugarren bat Aztirian jarriko lukete, oraindik zehatz ez baldin badakite ere. Bestetik, Alegia, Orbeldi eta Santa Luzia ibarreko gabiriarrek Santa Luzia-Anduaga auzora joan beharko dute hondakinak botatzera, Ezkio-Itsaso Udalak han egokituko duen gunera.

Edukiontzi guztiak egongo dira gune horietan, birzikla ezin litezkeen hondakinena barne. Giltzarekin jarri ala ez, oraindik erabakitzeko daukate. Aurrerantzean, udalerri bakoitzak sortzen duen hondakin kopuruaren arabera ordaindu beharko du bilketa eta tratamendu zerbitzua.


Herriak argi eta garbi hitz egin du, gaur. Goi tentsioko linearik ez du nahi. Deikaztelu-Itsaso arteko 400.000 volteko ‘autopista elektrikoa’-rekin “bat” al dauden galdetu die herritarrek osatutako talde batek gainerakoei. Eta bozketan parte hartu duten guzti-guztiek -eta ez dira gutxi izan-  ezetz esan dute. 274 lagun joan dira atzo eta gaur beren iritzia agertzera, herriko ostatuaren aurrean jarritako mahaira. Den-denek errefusatu dute argindar linearen proiektu hori.

Partaidetza altua izan du herri galdeketak (Goierriko beste bi herritan -Mutiloan eta Zerainen- eta Nafarroako 37 herritan edo kontzejutan ere egin da). Galdeketaren antolatzaileek ezin izan dute hautesle erroldarik erabili, kontsultak ez zuelako izaera ofizialik. Hala eta guztiz, azkeneko hauteskundeetan (Eusko Legebiltzarrerakoak, 2012ko urrian) errolda 383 lagunekoa zela kontuan izanda, gaurko herri galdeketaren parte-hartze maila %71,5 ingurukoa izan da Gabirian.

Herritarrek bi modutara agertu ahal izan dute iritzia. Batetik, “Itsaso eta Deikaztelu arteko goi tentsioko linearen proiektuarekin bat nator?” galderari ‘bai’ ala ‘ez’ erantzun behar zieten, herrian erroldatutakoek soilik. Bestetik, REE Red Electrica de España enpresa sustatzaileari eta Espainiako Industria eta Energia Ministerioari helegite bana igortzeko modua izan dute, hala nahi zuten pertsona guztiek (denera 295 bat alegazio jaso dira, sinatuta).

Emaitza garbi geratu da: herriak ez du goi tentsioko línea gehiago eraikitzerik nahi. Galdeketaren emaitzen berri ematen duen agiria Arazuri herrira (Nafarroa) eraman dute, han bildu baitituzte Nafarroako eta Gipuzkoako galdeketa guztien emaitzak.

This slideshow requires JavaScript.


Horixe izango da galdera, herritarrek asteburuan erantzun ahalko dutena. Deikaztelu eta Ezkio-Itsaso arteko goi tentsioko argindar linearen proiektua gauzatu nahiko luketen, bai ala ez. Horiexek erantzunak. Herritarrek antolatutako galdeketa egingo da bihar eta etzi (larunbat-igandeak, ekainak 15 eta 16), Gabirian, Mutiloan, Zerainen eta Nafarroako 33 herri eta kontzejutan.

REE Red Eléctrica de España SA enpresak aurrera daraman proiektuaren aurrean herritarrek zer iritzi duten jakin nahi du Autopista Elektrikorik Ez mugimenduak, eta herri galdeketan parte hartzera animatu ditu herritarrak.

Galdeketa bi egunetan egingo da. Bihar, larunbata, 19:00etatik 21:00etara egongo da iritzia emateko aukera. Igandean, egun osoan (09:00etatik 19:00etara). Herrian erroldatuta egon behar da parte hartzeko, eta 18 urtetik gorakoa izan adinez. Plataformako kideak gaur arratsaldean ibili dira etxez etxe informazioa eta bozketarako papertxoak banatzen.

Berez kontsulta ofiziala ez denez, ezingo dute ez erroldako zerrendarik, ez eraikin publikorik erabili galdeketa egiteko. Ostatu aurrean jarriko dituzte hautesontziak. Han sartu beharko da papertxoa, “Ados al zaude Deikaztelu-Itsaso linearekin?” galderari erantzunda, ‘Bai’ ala ‘Ez’ dioen laukitxoetako bat X batekin markatuta.

Bide batez esan, Autopista Elektrikorik Ez plataformak Deikaztelu-Itsaso linearen gainean zentratu du aurkako kanpaina, eta kontsultan ere horri buruz zuzendu dute galdera. Beste proiektu bat ere bada abian, ordea, nahiz eta aipamenik ia apenas egin zaion: Gueñestik (Bizkaia) Ezkio-Itsasoko zentralera bitartekoa, bestea bezalaxe 400.000 volteko indarra garraitzeko. Prozedura hori ere martxan du REEk, eta Gabiriako udal barrutik igaroko litzateke.

Goi tentsioko azpiegituren aurkako pankarta, Euskal Herriko Itzulia Gabiriatik pasatu zenean, apirilaren 5ean./AMM

Goi tentsioko azpiegituren aurkako pankarta, Euskal Herriko Itzulia Gabiriatik pasatu zenean, apirilaren 5ean./AMM

Ofizialtasunetik aparte, zilegitasuna aldarrikatu dute herritar taldeek galdeketak egiteko. “Helburua jendearen iritzia nolabait islatzea da, portzentaje baten bidez”, adierazi dute gaur plataformako kideek.

Herri kontsultaren garapen egokia behatzeko, lau goierritar ospetsu gonbidatu ditu plataformak: Iñaki Mendiguren idazle eta itzultzaile ezkiotarra, Elixabete Garmendia kazetari ormaiztegiarra, Inaxio Usarralde euskaltzale lazkaotar-usurbildarra, eta Iñaki Murua bertsolari gabiriarra.

Gipuzkoan eta Nafarroan galdeketa egingo dute 37 herrietako emaitzak Arazurin (Nafarroa) batuko dituzte, igande iluntzean. Ondoren, REE enpresari eta Espainiako Gobernuaren Industria eta Energia Ministerioari igorri diete emaitza. Goierriko hiru herrietako herritarrek atzo arratsaldean eman zituzten galdeketaren xehetasunak, Mutiloako Gurruntzain frontoian.

Galdera, erraza eta argia da: “Ados al zaude Deikaztelu-Itsaso linearekin?”. Erantzuna, baita ere.


Autopista Elektrikorik Ez plataformak prentsaurrekoa egin zuen, larunbat eguerdian, Donostian. Deikaztelu-Itsaso goi tentsioko argindar linearen proiektuaren prozedura administratiboa aurrera doala gaitzetsi, eta jarrera hori Espainiako Gobernuaren partetik “inposizioa” dela salatu du. Nafarroako eta Gipuzkoako 173 alkatek maiatzaren 15ean Espainiako Gobernuaren ordezkaritzan aurkeztutako eskariari ez diola kasurik egin salatu du. Proiektuaren tramitazioa gerarazteko, eta erakusketa publikoan ez jartzeko eskatu zuten alkateek, harik eta 2014-2022 plangintza elektrikoa onartzen ez den bitartean, behintzat. REE Red Electrica de España SA enpresak —proiektuaren egilea eta sustatzailea— maiatzaren 31n argitaratu zuen proiektuaren erakusketa publikoa eta baimen eskaera Gipuzkoako eta Nafarroako aldizkari ofizialetan. Proiektua udaletara ere iritsi da.

Agerraldian izan ziren Ibon Elkarresta Gabiriako alkatea eta  Iñaki Ugalde Mutiloakoa ere. Udalburuek proiektuaren aurka dauden 216 udal eta kontzejuen izenean esan dutenez, kaltetuak izango diren ia herri guztietako erakunde lokalen ordezkariekiko errespetu falta da tramitazioarekin segitzea. Neurri horretako proiektu erraldoi bat horrenbesteko azkartasunarekin tramitatu nahi izatea harrigarritzat jo dute, eta gogorarazi dute REEk berak aitortua duela inolako urgentziarik ez daukala linea horrek. “Herrien etorkizuneko garapena baldintzatuko du lineak. Gainera, bere beharraren justifikaziorik ez dago ez hornikuntza aldetik, ez energia eskaera aldetik”.

Plataformaren bozeramaile Alberto Friasek gaineratu du autopista elektriko horrek 127 kilometro luze izango dituela, Deikaztelu (Nafarroa) eta Itsaso (Ezkio-Itsaso, Goierri) artean. Berez Gabirian amaituko da linea, Katarain baserriaren inguruan, hor Gasteiz-Itsaso lineari batuko bailitzaioke. Zabalean 50 metroko pasabidea soilduko lukete, azpian. 248 dorre eraikiko dituzte, 85 metroko altuera ere hartuko dutenak. “Natura 2000 Sarean babestuta dauden eremuei zuzenean eragingo die lineak, Urbasa-Andia edo Oria Garaia Zaintza Bereziko Zonaldeei adibidez, Galzorian dauden espezieen Euskal Katalogoko 57 espezieri ere bai, eta hiru mila zuhaitz (623 haritz, 613 pago eta 268 arte) moztea ekarriko luke berehalako ondoriotzat.

Prentsaurrekoa Donostiako Atotxa dorrearen oinean egin dute, hain justu. Hiriko etxebizitza garaiena da, 70 metro altukoa. Alderaketa egin dute, eraiki nahi dituzten dorreen altuera 85 metrokoa dela nabarmenduz.

Agerraldia Donostian. Linearen matxoiek Atotxa dorreak (70 metro ditu) baino 15 metro gehiagoko altuera izango lukete.

Agerraldia Donostian. Linearen matxoiek Atotxa dorreak (70 metro ditu) baino 15 metro gehiagoko altuera izango lukete.

Bestetik, Friasek esan du jakinazpen publian jarritako proiektuak ez duela betetzen Europako Batasunaren Prekauzio Printzipioa, eremu elektromagnetikoek osasunean izan dezaketen kalteen ingurukoa. Proiektuaren memorian dioenez, 28 herri lineatik 1.000 metrora baino gutxiagora geratuko lirateke, bost herrigune 500 metro baino gutxiagora, eta 17 etxebizitza 300 metro baino gutxiagora”. Eragina izango duten eskualdeek etorkizunean ez dutela garapen proiekturik garatzerik izango gaineratu du, eta gaur egun indarrean dagoen araudia de facto indargabetzea.

Ekainaren 16an, hurrengo igandean, Nafarroako eta Gipuzkoako 34 udalerritan —tartean da Gabiria— burutuko diren herri kontsultetan parte hartzeko eskatu du plataformak. Erakundeei, berriz, Diputazioarengandik eta gobernu atuonomikoengandik hasita, aterako diren emaitzak aintzat hartzeko eta boto-kutxetako herritarren gehiengoaren nahia errespetatzeko esan die. Herri galdeketaren xehetasunak ostegunean emango dituzte plataformakoek.