‘Bertsolaritza’ atalaren artxiboa


Iñigo Murua 14 urteko mutikoaren arazo neurologikoak tratatzen laguntzeko, gabiriarrek erantzun dotorea eman dute. Aurreko ostiralean bertso afaria egin zen, Osinalde elkartean. Soziedadea bete egin zen. 95 lagun joan ziren afaltzera. Aitor Mendiluze, Iker Zubeldia, Endika Igartzabal eta Gorka Maiz ziren bertsotan. Saio “oso ona” borobildu zuten. Murua mutikoaren sendikoek eta afariaren antolatzaileek zera esan dute: “Dena oso ondo irten zen; afaria, saio oso ona eta eta diru dezente atera zen. Oso gustura gelditu ginen”.
bertso1

bertso2


Aurreko ostiralean herriko bertsolaritzak beste mugarri bat jarri zuen, oraingo honetan Aizpurutxoko sakonean. Urretxu eta Azkoitia harteko auzo hartan, III. Bertso Saria izan zen, Itziar jatetxean, afal ondoren. Mikel Asurabarrenak, Aratz Igartzabalek eta Aitzol Iturbe antzuolar lagunak osatutako taldeak irabazi zuen lehiaketa. Mugarria jarri baino hobeto, berritu; 2011n Maialen Akizuk irabazi baitzuen lehen edizioko saria, orduan bakarka.

Saio osoan erregularrenak Gabiriako hirukotea izan zela ebatzi zuten epaileek (lehian ziren hiru herrietako ordezkari banak osatua). Bigarren Azkoitiko taldeak egin zuen (Eneritz Artetxe —iazko garailea, eta aurten bertsoaldirik onenaren egilea—, Silvia Etxaniz eta Ugaitz Beristain), eta hirugarren Zumarraga-Urretxukoak (azken orduan taldea aldatu zuten, eta Mikel Iturriotz —gaueko bertsolari onena—, Beñat Torres eta Antton Fernandez).

Aurten, sariketaren hiru urteko bizialdian lehenengo aldiz, herri arteko desafio gisara egin dute lehiaketa, taldeka.

Aizpurutxoko III. Bertso Sariko bederatzi kideak./Gorka Azkarate

Aizpurutxoko III. Bertso Sariko bederatzi kideak./Gorka Azkarate


Iñigo Murua gabiriar jatorriko mutiko urretxuarraren alde bertso afaria egingo da herrian. Osinalde elkartean da, ekainaren 21ean, ostiralarekin. 21:00etan hasiko da afaria, eta prezioa 20 euro da. Izena emateko telefono zenbaki honetara hots egin behar da: 688 63 55 32 (Jokin). Bertsotan Aitor Mendiluze, Iker Zubeldia, Endika Igartzabal eta Gorka Maiz ariko dira.

Tantaz tanta, lagundu Iñigo kanpainaren barruko ekitaldia da, Iñigori laguntzeko. Jaio aurretik burmuineko infartoa eduki zuen, eta ondorio neurologikoak utzi zizkion. Otsailetik Santiagon (Galizia) dago, hango erietxe batean tratamendua jarraitzen. Familiari diruz laguntzeko abiarazi dute elkartasun kanpaina Urretxu-Zumarragako eragileek. Ekainaren 16an kontzertu benefikoa egingo da (20:00etan, Zumarragako Zelai Arizti aretoan); ekainaren 26an eta 27an ikastolako DBHko haurrek ikuskizun benefikoak egingo dituzte (19:00etan, Zelai Ariztin), Urretxuko 3×3 saskibaloi txapelketako izen-emate dirua familiarentzat izango da; Urretxuko eta Zumarragako udalei laguntza eskatu diete… Eta herrian ere aletxoa ipiniko dute, bertso-afariarekin.

Bertso afaria


Aratz Igartzabal, Mikel Asurabarrena eta Aitzol Iturbe izango dira, ostiralean, Gabiriako taldearen izenean Aizpurutxoko III. Bertso Sarian kantari ariko diren bertsolariak. Iturbe antzuolarra da, eta gabiriarrekin laguntasuna du. Bertsotan ondo egiten du, gainera. Urretxu-Zumarragako Martxoan Bertsoa lehiaketa herrikoian parte hartu du aurten, Gabirisprint3 taldean Iban Maizekin eta Eñaut Asurabarrenarekin. Sailkapen orokorrean laugarren geratu ziren, finaletik kanpora geratu zen lehenengoa, alegia.

Zumarraga-Urretxuk beterano taldea eramango du Aizpurutxora. Gorka Azkarate, Gorka Ojanguren eta Asier Sasieta ariko dira. Azkoitiarrek, berriz, Eneritz Artetxe (iazko txapelduna), Silvia Etxaniz eta Ugaitz Beristain. Afaria 20:30ean hasiko da, Itziar jatetxean. Ondoren da saioa. Aurten taldekakoa izango da, herrien arteko desafio gudua.

Aizpurutxoko iazko bertso sariketan Eneritz Artetxe izan zen txapeldun. Jokin Sudupe gabiriar-azkoitiarrak ere kantatu zuen. Gai jartzen Maialen Akizu jardun zen./Gorka Azkarate

Aizpurutxoko iazko bertso sariketan Eneritz Artetxe izan zen txapeldun. Jokin Sudupe gabiriar-azkoitiarrak ere kantatu zuen. Gai jartzen Maialen Akizu jardun zen./Gorka Azkarate


Aizpurutxon (Urretxu eta Azkoitia bitarteko auzoan), auzoko hirugarren bertso sariketa jokatuko da, ostiralean. Herri arteko bertso desafio gisa planteatu dute aurten, hiru talderen artean. Tartean, gabiriarrak izango dira. Azkoitiko taldea, Gabiriakoa eta Zumarraga-Urretxuko ariko dira kantuan. Bertso afaria izango da, Itziar jatetxean, 20:30ean hasita. Izena emateko: Itziar jatetxea (943 85 26 30) eta Gorka (652 77 80 36).

Sariketa horren lehendabiziko edizioa, 2011n, Maialen Akizuk irabazi zuen.

Aizpurutxoko III. Saria bertso lehiaketaren kartela.

Aizpurutxoko III. Saria bertso lehiaketaren kartela.

 


Aratz Igartzabal Bidegain eta Maialen Akizu Bidegain lehengusuek Gipuzkoako Eskolarteko 33. Bertsolari Txapelketaren finalean parte hartuko dute, gaur, ostirala. Tolosako Leidor antzokian da saioa, 16:00etan hasita. Aratzek Arrasaten kantatu zuen kanporaketa fasean (maiatzaren 17an), eta Maialenek Zarautzen (maiatzaren 10ean). Biak helduen mailan (15-18 urte bitartekaok) ari dira parte hartzen. Maialen Lujanbio bertsolari txapeldunak aurkeztuko du saioa.


Herriko gazte talde batek aurtengo neguan grabatu duen Benemeritoak filma emango dute, gaur 22:00etan, Etxeberri kultur etxean. Udaberri Kulturala egitarauaren barruko ekitaldia da. Gattiken ekoiztetxeak egin zuen pelikula, herriko gazteak aktore dituena. Euskal Herriak independentzia lortu ondoren, guardia zibil batzuk bertsolaritzaren bidetik saiatuko dira gizartean txertatzen. Beasaingo Bertsomovieda film lehiaketara aurkeztu zuten lana. Abenduaren 31n antzerkia egin zuten, istorio berean oinarrituta.

'Benemeritoak' filmaren irudi bat./Gattiken

‘Benemeritoak’ filmaren irudi bat./Gattiken

Pelikula emateaz gain, gaizki ateratako eszenen bideoa ere botako dute.

Udaberri Kulturalak bihar jarraituko du. Balentzategi herri eskolako ikasleek ikuskizuna egingo dute, 17:00etan, eliza ondoko antzokian. Antzerkia, dantza eta bertsoa uztartuta osatu dute urteroko emanaldia.


Gabiriarrek kudeatzen duten Beasaingo Murgil tabernan bertso saio musikatua izango da, gaur. 22:00etan hasiko da ikuskizuna. Mantxi, Jokin Labaien, Xamoa eta Jon Martin bertsolariak ariko dira, batetik; eta Ixak Arruti eta Eneko Sierra musikariak, bestetik. Iker Iriarte da gai jartzaile.

Kartela


Hamar irabazle emakumezkoak baditu jada Osinalde sariketak. Larunbatean, 42. Osinalde Sarian, azken urteetako joera gailendu zen: kantatzen gehienak mutilak (lau), baina garailea neska bat: Nerea Ibartzabal markinarra. Bizkaira bosgarren garaikurra joan da,  hala.

Ibartzabalek jaso zuen entzuleen saria ere, epaileenaz gain. Sari nagusia, Itsasoko Pott zeramika tailerrak egindako irudia, Osinalde elkarteko batzordeko kide Eli Olariagak eman zion Nereari.

Nerea Ibartzabal, irabazlea./Eneritz Gorrotxategi –Osinalde elkartea

Nerea Ibartzabal, irabazlea./Eneritz Gorrotxategi –Osinalde elkartea

Bertsolari bati bi sari ez emateko ohitura dagoenez, bigarrena ere izendatu dute aurten: Imanol Uria algortarra. Herriko hiru jatetxek (Ostatua, Aztiri erretegia eta Korta) ipintzen duen garaikurra Juanlu Eskudero ostalariak eman zion.

Sariketako hirugarren sari tradizionala, bertsorik onenaren egilearena, Iñaki Alemane iruritarrak jaso zuen, hamarreko txikian ofiziotan hirugarren bertsoagatik. Altzibar lorazaintza enpresak eskainia, Edorta Atinek eman zion ikurra.

Sariak jaso zituzten bertsolariak: Aleman, Ibartzabal eta Uria. /Eneritz Gorrotxategi–Osinalde elkartea

Sariak jaso zituzten bertsolariak: Aleman, Ibartzabal eta Uria. /Eneritz Gorrotxategi–Osinalde elkartea

Beste hiru kantukideak Josu Oiartzabal azpeitiarra, Nekane Zinkunegi errezildarra eta Peio Ormazabal arrigorriagarra ziren. Baztarrika gaztandegiko gazta bana oparitu zieten sei bertsolariei. Eñaut Asurabarrenak aurkeztu zuen.

Sei bertsolariak eta gai-jartzailea./Eneritz Gorrotxategi–Osinalde Elkartea

Sei bertsolariak eta gai-jartzailea./Eneritz Gorrotxategi–Osinalde Elkartea

Elkartea bete egin zen, beste behin. Afaltzen 115 lagun ziren, eta jende gehiago sartu zen gero saioa entzuteko. Errifako zenbaki saridunak atera zituzten, hauek:

  • Gabiriako Ostatuan bi lagunentzat afaria: 1054 zenbakia.
  • Korta jatetxean bi lagunentzat afaria: 538 zenbakia.
  • Aztiri Erretegian bi lagunentzat afaria: 317 zenbakia.

Lehenbiziko txartelaren eroslea soziedadean bertan zegoen. Beste bi sarien jabeek hilabeteko epea daukate jakinarazteko. Errifaz gain, porra ere egin zuten, sariak nork jasoko zituen aurrez esanda. Eli Olariagak asmatu zuen ‘kiniela’.

Elkartea, larunbat gauean./Eneritz Gorrotxategi–Osinalde Elkartea

Elkartea, larunbat gauean./Eneritz Gorrotxategi–Osinalde Elkartea


Beasaingo Arrano kultur elkarteak bigarren urtez antolatu duen Bertsomovieda lehiaketan gabiriarrek ez dute batere saririk jasoko, aurten. Internet bidezko bozketa herrikoian lehen postua lortzeko zorian geratu ziren, eta epaimahaikoak izendatutako saririk ez dute izango. Gaur jakinarazi dute zein bideok irabazi duten: lehenengo ’9 hilabete’, aipamen berezia ‘Bakardadean ezkutaturik’, bertsorik onenak dituen filma ’9 hilabete’-k, eta gazteen saria ‘Bizitzaren ikuspegiak’.

Iaz sari nagusiaren erdia eskuratu zuen herriko gazteen ‘Bertso Road Movie’-k, aurten irabazle izan direnekin erdibana.


Osinalde bertso sariketaren 42. ekitaldirako osagai guztiak eltzean daude. Bihar, larunbata, jokatuko da sariketa, sei bertsolari gazterekin. Afaria 20:30ean hasiko da, eta ondoren izango da bertso saioa, 22:30-23:00ak aldera. Afaritarako txartel guztiak salduta daude. Saioa entzuteko, sarrera libre da.

Aurrez jokatu diren hiru sarieketetan bina lagunek jaso zuten Gabirian aritzeko txartela. Argi-Berritik (martxoak 9) Josu Oiartzabal azpeitiarra eta Nekane Zinkunegi errezildarra etorriko dira; Osinberdetik (martxoak 16) Iñaki Aleman iruritarra eta Nerea Ibartzabal markinarra; eta Aztiritik (martxoak 23) Peio Ormazabal arrigorriagarra eta Imanol Uria algortarra.

Saioa 42.a den arren, irabazlea 41.a izango da, 1996an ez zelako sariketa izan, 25. urteurreneko saio berezia baizik. Garaile guztiak, hemen.


Aztiri bertsolari sariketa larunbat gauean jokatu zen, auzo hartako Aztiri-Bat elkartean. Sei bertsolari gazte kantuan, eta hiru behintzat protagonista, izen propioz. Aztiri saria, entzuleen irudiko gaueko bertsolari onena izan dena, bozketa herrikoiz, Eneritz Artetxe azkoitiarrak jaso zuen. Hark jaso zuen boto gehien, entzuleen partetik. Epaimahaikoaren iritzia, ordea, bestelakoa izan zen. Osinalde sariketara pasea eman zien bi bertsolarien artean ez zen sartu Artetxe. Epaileek —ezkutuan aritzen dira lanean— Peio Ormazabal arrigorriagarra eta Imanol Uria algortarra apartatu zituzten, aurrerako.

Ezkerretik eskuinera, Aztirian aritu ziren seiak: Eneritz Artetxe, Imanol Irazustabarrena, Joanes Etxebarria, Imanol Uria, Maddi Ane Txoperena eta Peio Ormazabal./Eneritz Gorrotxategi – Osinalde elkartea

Ezkerretik eskuinera, Aztirian aritu ziren seiak: Eneritz Artetxe, Imanol Irazustabarrena, Joanes Etxebarria, Imanol Uria, Maddi Ane Txoperena eta Peio Ormazabal./Eneritz Gorrotxategi – Osinalde elkartea

Jokin Matxinandiarenak aurkeztu zuen saioa. Koplak kantatzeko Miren Deba eta Ander Ibarguren trikitilarien laguntza izan zuten. Zortziko nagusian eta zortziko txikian binaka, hamarreko txikian ofiziotan, bina punturi erantzuten bakarka, gaia emanda bi bertso eta koplatan aritu ziren. Guztiak ere “txukun” aritu ziren, antolatzaileen esanetan. Afaltzen 80 lagun izan ziren, Aztiri-Bat elkartean. Ondoren, saioa entzutera jende gehiago sartu zen.

Osinalde sarian kantatzeko saikoa osatzeko, Aztiriko bi sailkatuen izenak jakitea besterik ez zen falta. Hala, apirilaren 6an honako sei gazteak ariko dira Osinalde elkartean: Josu Oiartzabal azpeitiarra eta Nekane Zinkunegi errezildarra (Ordiziako Argi-Berrin sailkatuak), Iñaki Aleman iruritarra eta Nerea Ibartzabal markinarra (Zaldibiako Osinberden), eta Peio Ormazabal eta Imanol Uria (Aztirian). Hiru bizkaitar, bi gipuzkoar eta nafar bat, Osinaldeko 41. irabazlea izateko hautagai.


Herriko gazteek eta Gattiken ekoiztetxeak prestatu duten film laburrak ezin izan du iazko saria errepikatu, aurten. Beasaingo Bertsomovieda lehiaketan, atzo bukatu zen Internet bidez botoa emateko epea, astebeteren ondoren. Gabiriarren lana bigarren geratu da, bozkatuenen zerrendan. Boto gehien Oñatiko Badator munizipala ikus-entzunezkoak jaso ditu, 950 inguru. Benemeritoak 900en azpitik geratu dira. Ostiralera arte zerrendan buru zeuden gabiriarrak, baina asteburuan irauli dute oñatiar internautek emaitza. Saria, 15 lagunentzat sagardotegian otordua da.

Oraindik, ordea, sari nagusia izendatzea geratzen da. Hori antolatzaileek egingo dute, epaimahaiko baten bidez. Hautagai nagusia Benemeritoak da, iaz bezala sari nagusia eramateko. Lehengo urtean, erdibanatu egin behar izan zuten sari hori. Aurten, bi sari eramateko arriskurik ez dutenez dagoeneko, ea.

Youtube-n dago film laburra. Dagoeneko 2.800 lagunek baino gehiagok ikusi dute.


Aurten herriko bertsolari talderik ez da ariko Martxoan Bertsoa bertsolari lehiaketa herrikoiaren finalean. Inoizko partaidetza jendetsuena izan arren, hori. Hiru talde osatu ziren herrian, Gabirisprint I, II, eta III.

Hala ere, herritarren ordezkaritza izango da finalean: Maialen Akizu Bidegainek kantatuko du, Kontuz Atsuak taldean, Itziar Pildainekin eta Amaia Iturriotzekin. Beste bi talde finalistak Maneksen Banda (Manex Mantxola, Antton Fernandez eta Gaizka Oiartzabal Pitillo), eta Tzitzarito (Mikel Iturriotz, Jon Mendizabal, Jon Gurrutxaga) dira.

Finala ostiralean da, etzi, martxoak 22. 23:00etan hasiko da, Urretxuko Gaztelekuan.

Martxoan Bertsoko laugarren eta azken kanporaketa larunbatean jokatu zen, Legazpiko gaztetxean. Saioko emaitzak jakin orduko itxi zen sailkapen nagusia ere, eta lehen hirurek lortu zuten txartela.

Gabirisprint3 taldekoak, aurtengo lehiaketan errebelazioa. Finalaren atarian geratu dira, laugarren. Foxen kantatu zuten, ostiralean.

Gabirisprint3 taldekoak, aurtengo lehiaketan errebelazioa. Finalaren atarian geratu dira, laugarren. Foxen kantatu zuten, ostiralean.

Hamabi taldek parte hartu dute Martxoan Bertsoan, aurten. Horietatik hiru gabiriarrak. Denera hamar bertsolari gabiriar aritu dira.

Sailkapen nagusia nola geratu den:

  1. Kontuz Atsuak (Amaia Iturriotz, Maialen Akizu, Itziar Pildain): 193,65 puntu.

  2. Maneksen Banda (Manex Mantxola, Gaizka Oiartzabal Pitillo, Antton Fernandez): 185.

  3. Tzitzarito (Mikel Iturriotz, Jon Mendizabal, Jon Gurrutxaga): 184,25.

  4. Gabirisprint3 (Aitzol Iturbe, Iban Maiz Banagas, Eñaut Asurabarrena Gaztie): 181,75.

  5. Urola Garaiko Selekzioa (Beñat Torres, Julen Agirreburualde, Manex Agirrezabal): 181.

  6. Bi eta Bat (Aitor Lizarazu Ginz, Urko Egaña, Beñat Zamalloa): 180,7.

  7. Atzeko Kaleko Mutilak (Asier Sasieta, Xabier Elgarresta, Gorka Santesteban): 180,25.

  8. Gabirisprint2 (Gorka Maiz Pastel, Mikel Asurabarrena, Oier Oiarbide): 178,5.

  9. Gabirisprint1 (Jokin Murua, Aratz Igartzabal Potto, Endika Igartzabal): 177,7.

  10. Trasteroko Morroiak (Gorka Ojanguren, Zaldua, Jaka): 177,5.

  11. Potato Barria (Asier Otamendi, Rikardo, Serapio): 177.

  12. Udanako Kurbak (Ulises, Asier Iriondo, Gorka Azkarate): 167,75.


Osinalde bertso sariketaren 42. ekitaldia ari da bertsolariz hornitzen. Hiru kanporaketatatik bi jokatu dira, eta lau bertsolariren izenak jakinak dira dagoeneko. Azkeneko bi finalistak Aztiri Sarian izendatuko dituzte, larunbatean.

Martxoaren 9an Ordiziako Argi-Berri saritik Josu Oiartzabal azpeitiarra eta Nekane Zinkunegu errezildarra sailkatu ziren. Aurreko larunbatean, martxoak 16, Zaldibiako Osinberde estreinako sariketan Iñaki Aleman iruritarrak eta Nerea Ibartzabal markinarrak lortu zituzten jokoan ziren bi txartelak.

Iñaki Aleman iruritarra, Osinberden irabazle.

Iñaki Aleman iruritarra, Osinberden irabazle.

Argi-Berriko seikoa. Ezkerretik lehena Zinkunegi, mikroarekin Oiartzabal.

Argi-Berriko seikoa. Ezkerretik lehena Zinkunegi, mikroarekin Oiartzabal.

Larunbatean, hilak 23, Aztiri-Bat elkartean da bertsolaritzaren festa. Afaria 20:30ean hasiko da, eta ondoren izango da saioa, Jokin Matxinandiarenak aurkeztuta. Honako seikoa ariko da kantuan: Maddi Ane Txoperena (Hendaia), Imanol Uria (Algorta), Eneritz Artetxe (Azkoitia), Peio Ormazabal (Arrigorriaga), Imanol Irazustabarrena (Alegia, Gipuzkoa) eta Joanes Etxeberria (Barkoxe).